رووداوێکی سەختی هاتووچۆ لە پێنجوێن؛ ژمارەیەک هاونیشتمانی گیانیان لەدەستدا

رووداو دیجیتاڵ

رووداوێکی سەختی هاتووچۆ لە سنووری قەزای پێنجوێن لە پارێزگای سلێمانی روویدا. قایمقام دەڵێت، سێ کەس گیانیان لەدەستداوە.

رووداوەکە لەنێوان بارهەڵگرێک و ئۆتۆمبێلێکی تایبەت لە نزیک ناحیەی ناڵپارێز روویداوە. هێمن ئیبراهیم، قایمقامی پێنجوێن بە تۆڕی میدیایی رووداوی گوت، "بەگوێرەی ئاماری سەرەتایی، سێ کەس گیانیان لەدەستداوە."

بێستوون مەحموود، کارمەند لە هاتووچۆی پێنجوێن کە هێڵکاریی بۆ رووداوەکە کردووە بە تۆڕی میدیایی رووداوی گوت، "سێ کەس گیانیان لەدەستداوە و ژمارەیەک هاونیشتمانیی دیکەش بریندارن."

بێستوون مەحموود گوتیشی، "سەرجەم قوربانییەکان ئەندامی یەک خێزانن و خەڵکی گوندی سەرسووراون لە پێنجوێن. دایکێک و دوو منداڵی گیانیان لەدەستداوە. باوکی منداڵەکان لەگەڵ منداڵێکی دیکەیدا بە سەختی بریندارە."

قایمقامی پێنجوێن گوتی، ئۆتۆمبێلە بارهەڵگرەکە لەو ئۆتۆمبێلانەیە کە ئۆتۆمبێل دەگوازنەوە و شۆفێرەکەی خەڵکی ئێرانە.

بریندارەکان رەوانەی نەخۆشخانەی فریاکەوتنی سلێمانی کراون و پۆلیسی هاوتووچۆ پەڕاوی لێکۆڵینەوەی بۆ رووداوەکە کردووەتەوە.