رووداو دیجیتاڵ
لە رووداوێکی هاتووچۆدا لە رێگەی نێوان بۆکان - مهاباد هەشت کەس گیانیان لەدەستدا. بەڕێوەبەری رێکخراوی ئاگرکوژێنەوەی مهاباد دەڵێ، کاژێر 4ـی ئێوارەی رۆژی هەینی، تەلەفۆن بۆ بەشی فریاگوزاری ئەو رێکخراوە کراوە و هەواڵی پێکدادانی 2 ئۆتۆمبێل لەڕێگەی نێوان مهاباد و بۆکانیان پێداوە.
بە گوتەی رەحمان ئەحمەدی، دوو تیمی فریاگوزاری لە مهابادەوە چوونەتە شوێنی رووداوەکە و 5 کەس لەوانەی لەنێو هەر دوو ئۆتۆمبێلەکەدا بوون لەو رووداوەکەدا گیانیان لە دەستداوە و 5 کەسیش بە سەختی بریندار بوون کە نێردراونەتە نەخۆشخانە.
پۆلیسی هاتووچۆی مهاباد باسی لەوە کردووە، شەوی رابردوو و بەیانی ئەمڕۆ سێ کەسی دیکە لە بریندارانی رووداوەکە لە نەخۆشخانەی مهاباد گیانیان لەدەستداوە و ژمارەی مردووان گەیشتووەتە هەشت کەس. دۆخی تەندروستیی دوو بریندارەکەی دیکەش ناجێگیرە.
لە چەند رۆژی رابردوودا ژمارەی قوربانیانی رووداوی هاتووچۆ لە ئێران و رۆژهەڵاتی کوردستان، بەهۆی گەشتەکانی نەورۆزەوە زیادیکردووە.
بەگوتەی پۆلیسی هاتووچۆی ئێران، لە ماوەی 3 رۆژی رابردوودا 107 کەس بە رووداوی هاتووچۆ گیانیان لەدەستداوە.
تەیموور حوسێنی، جێگری سەرۆکی پۆلیسی هاتووچۆی ئێران گوتوویەتی، ئەمساڵ گەشتکردن لە ئێران 29٪ بەراورد بە کاتی هاوشێوەی ساڵی رابردوو زیادیکردووە و زۆرترین رووداوی هاتووچۆ لە چەند رۆژی رابردوودا لە پارێزگاکانی ورمێ، خوزستان، کرمان، سیستان و بەلووچستان و بووشێهر بووە.
ساڵانە لە ئێران 14 بۆ 16 هەزار کەس بە رووداوی هاتووچۆ گیان لەدەستدەدەن. پۆلیسی هاتووچۆی ئێران هۆکاری 40٪ـی ئەو رووداوانە دەگەڕێنێتەوە بۆ خراپی ئۆتۆمبێل لەو وڵاتە و 60٪یش بۆ نەبوونی رێگەوبانی ستاندارد و پابەندنەبوونی خەڵک بە رێکارەکانی هاتووچۆ لەو وڵاتە.
لە رووداوێکی هاتووچۆدا لە مهاباد هەشت کەس گیانیان لەدەستدا https://t.co/kXw3Deqa1X pic.twitter.com/mSrWHbeey5
— Rudaw (@Rudawkurdish) March 19, 2022
.jpg&w=3840&q=75)
