رووداو دیجیتاڵ
بەپێی زانیارییەکانی رووداو، کە لە یەکێتیی نیشتمانیی کوردستانەوە دەستیکەوتوون، ئەو حیزبە لە پارێزگای دیالە لە هەڵبژاردنی ئەنجوومەنی پارێزگاکانی عێراقدا 23 هەزار و 906 دەنگی بەدەستهێناوە.
بەپێی زانیارییەکانی تۆڕی میدیایی رووداو، کە بەرەبەیانیی رۆژی سێشەممە، 19-12-2023 دەستیکەوتووە، لیستی یەکێتی لە هەڵبژاردنی ئەنجوومەنی پارێزگاکان لە سنووری پارێزگای دیالە 23 هەزار 906 دەنگی بەدەستهێناوە، کە بەمشێوەیە بووە: "خانەقین 17 هەزار و 500 دەنگ، گوڵاڵە 1700 دەنگ، سەعدیە 1096 دەنگ، مەندەلی 677 دەنگ، جەبارە 1893 دەنگ، قەرەتەپە 1040 دەنگ."
رۆژی دووشەممە، 18-12-2023، دەنگدانی گشتی بۆ هەڵبژاردنی ئەنجوومەنی پارێزگاکانی 15 پارێزگای عێراق بەڕێوەچوو، لە کۆی 16 ملیۆن و 158 هەزار و 788 کەس کە بۆیان هەبووە دەنگبدەن لە هەردوو دەنگدانی گشتی و تایبەت گەیشتووەتە 6 ملیۆن و 599 هەزار و 668 کەس، بەو پێیە کۆی رێژەی دەنگدانی گشتی و تایبەت 41٪ بوون.
هەر بەپێی ئەو ژمارانە لە دەنگدانی گشتی لە کۆی 15 ملیۆن و 108 هەزار و 135 دەنگدەر، 5 ملیۆن و 892 هەزار و 963 دەنگدەر دەنگیانداوە و رێژەی دەنگدان 39٪ بووە.
هەرچی دەنگدانی تایبەتە (هێزە سەربازییەکان و ئاوارەکان): لەکۆی 1 ملیۆن و 50 هەزار و 653 دەنگدەر 706 هەزار و 705 کەس دەنگیانداوە، واتە رێژەی دەنگدان 67٪ بووە.
