رووداو دیجیتاڵ
وەزیری بەرگریی فەرەنسا دەڵێت، پرسەکانی پەیوەندیدار بە ناوچەکە لەگەڵ سەرۆکی هەرێمی کوردستان تاوتوێ دەکات.
رۆژی سێشەممە، 18-7-2023، سیباستیان لوکۆغنیو، وەزیری بەرگریی فەرەنسا لە تویتێکدا لەبارەی سەردانەکەی بۆ عێراق و هەرێمی کوردستان گوتی، "خۆشحاڵم لەگەڵ محەممەد شیاع سوودانی (سەرۆکوەزیرانی عێراق)، سابت محەممەد عەباسی (وەزیری بەرگریی عێراق) و نێچیرڤان بارزانی، سەرۆکی هەرێمی کوردستانی عێراق پرسەکانی پەیوەندیدار بە ناوچەکە و سەروەریی عێراق تاوتوێ دەکەم".
ئەمڕۆ سێشەممە سیباستیان لوکۆغنیو لە بەغدا لەگەڵ سابت محەممەد عەباسی، وەزیری بەرگریی عێراق کۆبووەوە و پێکەوە لەبارەی پەیوەندییە سەربازییەکانی نێوان هەردوو وڵات و دۆخی عێراق لە بواری ئاسایشەوە قسەیان کرد.
وەزیری بەرگریی عێراق کۆبوونەوەکەی لەگەڵ هاوشانە فەرەنسییەکەی بە بەرهەمدار ناوبرد و گوتیشی، "پێکەوە لەبارەی بوونی سەربازانی فەرەنسی لە چوارچێوەی هاوپەیمانیی نێودەوڵەتی و رۆڵی گرنگیان لە شەڕی دژی تیرۆر قسەمان کرد".
سبەی وەزیری بەرگریی فەرەنسا دەچێتە هەولێر و بە جیا لەگەڵ هەریەکە لە سەرۆک بارزانی و نێچیرڤان بارزانی کۆدەبێتەوە.
سیباستیان لیکۆرنیۆ و نێچیرڤان بارزانی پەیوەندییەکانی نێوان پاریس و هەولێر، دۆخی ناوچەکە و رووبەڕووبوونەوەی تیرۆر تاوتوێ دەکەن.
.jpg&w=3840&q=75)
