نێچیرڤان بارزانی، سەرۆکی هەرێمی کوردستان
رووداو دیجیتاڵ
سەرۆکی هەرێمی کوردستان لە رۆژی ئاڵای کوردستاندا رایگەیاند: "پێداگری لەسەر گرنگی و پێویستی و پەلەکردن لە پێکهێنانی کابینەی حکومەتی هەرێمی کوردستان دەکەین، بە لێکتێگەیشتنی لایەنە سیاسییەکان کە دەبێت ئەو ئەرکە جێبەجێ بکەن."
رۆژی سێشەممە، 17-12-2024، نێچیرڤان بارزانی، سەرۆکی هەرێمی کوردستان بەشدارییکرد لە رێوڕەسمێکی بەرز راگرتنی ئاڵای کوردستان و لەو چوارچێوەیەدا گوتارێکی پێشکێش کرد.
نێچیرڤان بارزانی لە گوتارەکەیدا لەبارەی پەیوەندییەکانیان لەگەڵ عێراق قسەی کرد و گوتی، بۆ چارەسەری کێشەکان ئامادەن بە دیالۆگ و لێکتێگەیشتن پێکەوە هەموو هاوکاری و هاوئاهەنگیی بکەن.
لەبارەی رۆژی ئاڵای کوردستان، سەرۆکی هەرێمی کوردستان باسی لەوەکرد: "یادی ئاڵای کوردستان لای کوردستانییان یادێکی بەرز و پیرۆزە و ئەم یادە هەمووان پێکەوە کۆدەکاتەوە، لەپێناو ئامانجێکی پیرۆزدا."
نێچیرڤان بارزانی گوتیشی: "ئاڵای کوردستان بەدەستی دڵسۆزانیەوە لەبەردەم هەموو سەختی و بەربەستەکاندا خۆڕاگر بووە."
لە باسی بارودۆخی ناوچەکەیدا، لە گوتارەکەدا ئاماژەی بەوەشکرد کە "ئەم ساڵ لە دۆخێکی هەستیاری ناوچەکەدا، یادی ئاڵای کوردستان دەکەینەوە. کاریگەری و لێکەوتەکانی رووداوەکان لەسەر ئاشتی و سەقامگیری بووەتە نیگەرانی."
نێچیرڤان بارزانی دڵنیایی دایە لایەن و وڵاتان کە بۆ کەمکردنەوەی گرژییەکان هاوکار دەبن: "هاوکاریی دەکەین بۆ گەڕان بەدوای چارەسەری ئاشتییانە کە مافی هەمووان بپارێزێت و داهاتوویەکی ئارام و جێگیر بۆ گەلانی ناوچەکە مسۆگەر بکات."
"ئەزموونی هەرێمی کوردستان لە پێکەوەژیانی ئاشتییانە دەتوانێت ببێتە نموونەیەک بۆ تێپەڕاندنی قەیرانەکان و بەدیهێنانی ئاشتی،" سەرۆکی هەرێمی کوردستان وای گوت.
نێچیرڤان بارزانی جەخت لەوە دەکاتەوە، "دەبێت هەموومان پێکەوە کاربکەین، بەرژەوەندیی باڵای گەلەکەمان لەسەرووی هەموو شتێکەوە بێت."
دەقی گوتارەکەی نێچیرڤان بارزانی:
كه‌سوكارى سه‌ربه‌رزى شه‌هيدان،
پێشمه‌رگه قاره‌مانه‌كان،
هێزه دڵسۆزه‌كانى ناوخۆ،
هاووڵاتييانى ئازيزى كوردستان..
ڕۆژتان باش،
ڕۆژى ئاڵای كوردستانتان لێ پيرۆز بێت.
ئەمڕۆ لەگەڵ جێگری سەرۆكی هەرێمى كوردستان، بەڕێز شێخ جەعفەر، خۆشحاڵین كە له‌م ڕێوڕه‌سمه‌دا بۆ يادى ڕۆژى ئاڵاى شه‌كاوه‌ى كوردستان به‌شدارين. ئه‌م ياده لاى كوردستانييان، بۆنەیەکی به‌رز و پيرۆزه. تيايدا ڕێز لە هێمايه‌كى زيندوو‌مان ده‌گرین کە ناسنامە و شکۆی نیشتمانمان بەرجەستە دەکات و وێڕاى جياوازييه‌كان، هه‌موومان پێكه‌وه كۆده‌كاته‌وه و له‌پێناو ئامانجێكى پيرۆزدا، يه‌كمانده‌خات.
ئەم ئاڵایە، کە بە ڕەنگە گه‌ش و جوانه‌کانى و به خۆرى زێڕینی، پەیامی خەبات و ئاواتەکانی گه‌لى كوردستان بە هەموو پێكهاتەكانییەوە هەڵدەگرێت، گوزارشت لە نیشتمان و شكۆدارى و پێكه‌وه‌يى و هاوچاره‌نووسيى ته‌واوى کوردستانییان دەکات.
كاتێك سه‌يرى ئاڵاكه‌مان ده‌كه‌ين، ڕه‌نج و قوربانيدان، شكۆمه‌ندى و شانازى، ئازادى و ئاشتى، نوێبوونه‌وه و ئاوه‌دانى، ئومێد و خه‌باتى هاوبه‌شى گه‌لى كوردستان به هه‌موو پێكهاته‌كانييه‌وه ده‌بينين.
ئاڵاى كوردستان به ده‌ستى دڵسۆزانييه‌وه، له‌به‌رده‌م هه‌موو سه‌ختى و به‌ربه‌سته‌كاندا خۆڕاگر بووه، بۆيه گه‌ل و وڵاته‌كه‌مان به هيوا و متمانه‌وه، به‌ره‌و داهاتوويه‌كى گه‌شتر، هه‌نگاو ده‌نێت.
کوردستانييانى خۆشەویست،
ئەمساڵ لە دۆخێکی هەستیار و ناسکى ناوچه‌كه‌دا، یادی ئاڵاى كوردستان دەکەینەوە. کاریگەرى و لێكه‌وته‌كانى ئاڵۆزى و ڕووداوه‌كان لەسەر ئاشتی و سەقامگیری، بوونه‌ته مايه‌ى نيگه‌رانييه‌كى زۆر. بۆيه ئه‌رك و به‌رپرسياريه‌تيى هه‌موو لايه‌كمانه كار بكه‌ين بۆ پاراستنى ئاشتی و سەقامگیری كه پێویستییەکی هەرە له‌پێشە بۆ ناوچه‌كه.
ئێمه له هه‌رێمى كوردستان پابه‌ندين به كاركردنى به‌رده‌وام له‌گه‌ڵ هه‌موو لايه‌نه په‌يوه‌نديداره‌كان له عێراق و لە ناوچه‌كه و له‌گه‌ڵ وڵاتانى جيهاندا، بۆ كه‌مكردنه‌وه‌ى گرژييه‌كان. پێكه‌وه هاوكاری ده‌كه‌ين بۆ به‌هێزكردنى ديالۆگ و گه‌ڕان به‌دواى چاره‌سه‌رى ئاشتييانه‌دا كه مافى هه‌مووان بپارێزێت و داهاتوويه‌كى ئارام و جێگير بۆ گه‌لانى ناوچه‌كه، مسۆگه‌ر بكات. ئه‌زموونى كوردستان له پێكه‌وه‌ژيانى ئاشتييانه، ده‌توانێت ببێته نموونه‌يه‌ك بۆ تێپه‌ڕاندنى قه‌يرانه‌كان و به‌ديهێنانى ئاشتى.
ئه‌مڕۆ كه ئاڵاى كوردستان به سه‌رمانه‌وه ده‌شه‌كێته‌وه، يه‌كبوونمان نيشان ده‌دات. ته‌بايى و پێكه‌وه‌ييى هه‌موو لايه‌نه سياسييه‌كان و پێكهاته‌كانى كوردستان، به‌تايبه‌تى له دۆخى ئێستاى ناوچه‌كه‌دا، هێز و کلیلی سەقامگیريی هه‌رێمى كوردستانه. بۆيه ده‌بێ هه‌موومان پێكه‌وه كار بكه‌ين و به‌رژه‌وه‌نديى باڵاى گه‌له‌كه‌مان، لەسەرووی هەموو شتێكەوە بێت.
هه‌ر به‌م بۆنه‌يه‌وه پێداگرى له‌سه‌ر گرنگى و پێويستيى په‌له‌كردن له پێكهێنانى كابينه‌ى نوێى حكوومه‌تى هه‌رێمى كوردستان دەكەین به لێكگه‌يشتنى لايه‌نه سياسييه‌كان كە دەبێت ئەو ئەركە بە زوویی جێبەجێ بكەن. له عێراقيش له‌گه‌ڵ حكوومه‌تى فيدراڵدا بۆ چاره‌سه‌ركردنى كێشه‌كان ئامادەین به ديالۆگ و لێكگه‌يشتن، پێكه‌وه هه‌موومان هاوكاری و هه‌ماهه‌نگی لەگەڵ یەكتر بكەین.
گەلی خۆشەویستی کوردستان،
ئاڵای کوردستان، ڕەنگدانەوەی به‌ها هاوبه‌شه‌كانى ئێمه‌يه كه ديدگا و سیاسەتەکانمان بۆ بنياتنانى كۆمه‌ڵگه‌يه‌كى مه‌ده‌نيى يه‌كگرتووى به‌هێز، پێکدەهێنن.
بۆيه له‌م بۆنه پيرۆزه‌دا، هاووڵاتييانى ئازيزى كوردستان و پێكهاته‌كانى لە هەرێمی كوردستان دڵنيا ده‌كه‌ينه‌وه كه به‌رده‌وام ده‌بين له به‌هێزكردنى پێكه‌وه‌ژيانى ئاشتييانه، چونكه باوه‌ڕمان وايه ديالۆگ و ڕێزله‌يه‌كگرتنى پێكهاته‌كانى كۆمه‌ڵگا، بنه‌ماى سه‌قامگيريی وڵاتە.
هه‌روه‌ها پابه‌ندين به پاراستنى كولتوورى پێكه‌وه‌ژيان و فره‌ئايينى و نه‌ته‌وه‌يى. ئه‌مه، سه‌رچاوه‌ى هێز و جوانى و مايه‌ى شانازيى گه‌لى كوردستانه. وه‌ك هه‌ميشه پشتيوان ده‌بين بۆ پاراستنى ناسنامه‌ى هه‌موو پێكهاته‌كان لە هەرێمی كوردستان.
كار ده‌كه‌ين بۆ چه‌سپاندنى ئازادييه‌كان و مافه‌كانى مرۆڤ و يه‌كسانى و دادپه‌روه‌رى كه بنه‌ماى سه‌ره‌كين بۆ بنياتنانى هه‌ر كۆمه‌ڵگه‌يه‌كى پێشكه‌وتوو. هه‌روه‌ها بۆ به‌هێزكردنى دامه‌زراوه‌كان و مسۆگه‌ريى به‌شداريى كاراى پێكهاته‌كان له هه‌موو كايه‌كانى ژياندا.
كۆڵ ناده‌ين و به‌رده‌وام ده‌بين له هه‌وڵدانمان بۆ چاره‌سه‌ركردنى كێشه‌كان به ديالۆگ، چونكه ئه‌وه ته‌نها ڕێگامانه بۆ نه‌هێشتنى ناكۆكييه‌كان و به‌هێزكردنى ته‌بايى و پێكه‌وه‌يى، له‌گه‌ڵ به‌هێزكردنى هاوكاريى هه‌رێمى و نێوده‌وڵه‌تى بۆ نيشاندانى كوردستان وه‌ك نموونه‌يه‌ك له ئاشتى و گه‌شه‌پێدان و پێكه‌وه‌ژيان و سەقامگیری.
هاووڵاتييانى ئازيزى كوردستان،
وێڕاى هه‌موو ئه‌و كێشه و ئاڵۆزييانه‌ى لە ناوچه‌كه‌دا هه‌ن، باوەڕمان وایە بە ئیرادەی يه‌كگرتوومان و به توانامان لە تێپەڕاندنی ناکۆکییەکان، دەتوانین ببینە بەشێک لە چارەسەر، نەک بەشێک لە کێشە. با پێکەوە کار بکەین بۆ پاراستنی ئاشتی و ببینە نموونه‌يەك لە بنیاتنانی سەقامگیری و هاوكاریی هاوبەش.
با ئاڵای كوردستان بەرز ڕابگرین و پەیمان نوێ بکەینەوە کە درێژە بە ڕێگاکەمان دەدەین بەرەو داهاتوویەکی گەشاوە. داهاتوويه‌ك كە تيايدا هەرێمى كوردستان ببێتە هیوا لە ناوچەکه‌دا.
هه‌ر به‌رز و هه‌ميشه شه‌كاوه بێت ئاڵای کوردستان.
سڵاو و دروود بۆ گيانى پيرۆزى شه‌هيدان. سه‌رى ڕێز و نه‌وازشيان بۆ داده‌نوێنين و ياديان هه‌ميشه به خێر.
هيواى ڕۆژێكى خۆشیش بۆ هه‌مووتان ده‌خوازم و دیسانەوە ڕۆژی ئاڵای پیرۆزی كوردستان لە هەموو كوردستانییان پیرۆز دەكەم. بەخێر بێن سەر چاو.
زۆر سوپاس..
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ