رووداو دیجیتاڵ
تەیف سامی، وەزیری دارایی عێراق بە وەزیرێکی کوردی گوتووە، "هیچ کێشەیەک بۆ ناردنی مووچە نییە" و بڕیارە لەگەڵ مووچەی عێراق، مووچەی مانگی ئەیلوولی هەرێمی کوردستان بنێرێت.
بەگوێرەی ئەو وەزیرە کوردە بۆ رووداو، ئەم هەفتەیە مووچەی فەرمانبەرانی عێراق و هەفتەی داهاتووش مووچەی هەرێمی کوردستان دابەش دەکرێت.
رۆژی یەکشەممە، مەسرور بارزانی، سەرۆکوەزیرانی هەرێمی کوردستان لەبارەی دواکەوتنی مووچە بە رەنجە جەمال، پەیامنێری رووداوی گوت، "هیچ بیانوویەک نییە بۆ دواخستنی مووچەی ئەم مانگە و مانگەکانی دیکە."
مەسرور بارزانی گوتیشی، بۆ ناردنی مووچە، هەرێمی کوردستان هەموو پابەندییەکانی جێبەجێکردووە.
ئەمڕۆ دووشەممە، ئەنجوومەنی وەزیرانی عێراق کۆبووەوە، بەڵام باسی مووچەی هەرێمی کوردستان نەکرا.
فەرمانبەرانی هەرێمی کورستان ئەم ساڵ تەنیا 8 مووچەیان وەرگرتووە.
