رووداو دیجیتاڵ
وەکو کاردانەوە لەبارەی رووداوی کوشتنی چوار ئەندامی ماڵباتەکەی هەولێر لەلایەن زاواکەیانەوە، ژمارەیەک رێکخراو بەیاننامەیەکی هاوبەشیان بڵاوکردووەتەوە و داوای فەراهەمکردنی مافی ژنان دەکەن و یەکێک لەو رێکخراوانە دەڵێت: "پێویستە فرەژنی قەدەخە بکرێ."
رۆژی دووشەممە، 17ـی ئاداری 2025، بەهار عەلی، سەرۆکی رێکخراوی (ئێمە) بۆ گەشەپێدانی مرۆیی بە تۆڕی میدیایی رووداوی راگەیاند، "پێمان وایە هۆکاری بەردەوام بوونی ئەم رووداوانە بۆ کولتووری پیاوسالاری دەگرێتەوە لە هەرێمی کوردستان، چونکە پیاوان بە شێوازێک پەروەردە دەکرێن کە دەتوانن لە ژێر ناونیشانی شەرەف و کێشەی کۆمەڵایەتی ژنان بکوژن ئەمە شتێکی تازە نییە بەڵام لەم ساڵانەی دوای بەهۆی سۆشیاڵ میدیا و رێکخراوەکان زیاتر پەردە لەسەر ئەم بابەتانە هەڵدراونەتەوە."
سەرۆکی رێکخراوی (ئێمە) دەڵێت، "راستە یاسای باشمان هەیە، بەڵام پێویستە حکومەت، دەزگاکانی راگەیاندن و مامۆستا ئاینییەکان زیاتر رۆڵیان هەبێت، پێویستە حکومەت بە یاسا، سزاکانی ئەم تاوانانە قورستر بکەن و لە کاتی بڕیاردان سەربەخۆ بن و حیزبەکانیش هاوکاربن."
بەهار عەلی پێی وایە پێویستە فرەژنی قەدەخە بکرێت و باس لەوە دەکات کە هۆکاری کوشتنی چوار ئەندامی ماڵباتەکەی هەولێر "فرەژنی بووە."
شەوی 13-03-2025، کەسێک بە ناوی (س.م ) هەڵیکوتایە سەر ماڵی خەزووری چوار ئەندامی ئەو ماڵباتەی کوشت و کەسێکی دیکەی بریندار کرد. ئاسایشی هەولێر لەبارەی رووداوەکە رایگەیاند: "رووداوەکە بەهۆی کێشەی کۆمەڵایەتییەوە روویداوە."
لەبارەی رووداوی کوشتنی د. سانا و خێزانەکەی، بەهار عەلی گوتی، "تەنیا داواکاریی د. سانا جیابوونەوە بووە، چونکە نەیتوانیوە خیانەت و فرەژنی قبووڵ بکات، پێوستە ژنکوژیی بوەستێندرێت لە ژێر ناوی کێشەی کۆمەڵایەتی و شەرەف، پێویستە هەر کەسێک ئەم کارەی کرد سەرکۆنە و قێزەون بکرێت چونکە کوردستان شوێنێکی سەلامەت نییە بۆ ژنان."
هاوکات 12 رێکخراوی بواری تووندوتیژیی دژی ژنان و مافی مرۆڤ لە راگەیێندراوێکی هاوبەشدا ئاماژە بەوە دەکەن، "دڵتەنگی و ترسی قووڵی خۆمان دەردەبڕین بەرامبەر کوشتنی دڕندانەی د. سانا کەمال، د. سەناریا کەمال، سەباحەت زاهیر و مامۆستا کەمال کۆیی کە لە کۆتایی هەفتەی رابردوو. ئەم کردەوە قێزەون و تووندوتیژییە، کە مێردی د. سانا دوای چەندین ساڵ خراپ مامەڵەکردن لە گەڵیدا کردی و پێویستی بە سەرنجدان و کرداری دەستبەجێ هەیە."
لە راگەیێندراوە هاوبەشەکەدا هاتووە، "ژنکوژی و پێشێلکردنی مافەکانی مرۆڤ و بووەتە کێشەیەکی بەربڵاو کە بەرۆکی کۆمەڵگاکەمان بەر نادات. لە ساڵی 2024ـدا، 40 رووداوی کوشتنی ژنان لە هەرێمی کوردستان تۆمارکراون و ئەم ساڵ 15 رووداو کە 8ـیان بە چەک کوژراون."
رێکخراوەکان داوایەک ئاراستەی دامودەزگاکانی حکومەت، مامۆستایانی ئاینی و کۆمەڵایەتییەکان و هەموو سێکتەرەکانی کۆمەڵگە دەکەن و دەڵێن، "پێویستە دادپەروەریی بۆ هەموو قوربانییانی ژنکوژیی لەڕێگەی دادگاییکردنی ئەنجامدەرانی توندوتیژی بە گوێرەی یاسا بهێندرێتە دی، لە نێوانیاندا کەیسەکەی د. سانا."
ئەو رێکخراوانەی بە هاوبەشی راگەیێندراوەکەیان لەبارەی رووداوەکانی ژنکوژیی بە گشتی بڵاوکردووەتەوە ئەمانەن:
- رێکخراوی سیید
- رێکخراوی ئاسودە بۆ بەرەنگاربوونەوەی تووندوتیژیی دژی ژنان
- رێکخراوی ئێمە بۆ گەشەپێدانی مرۆیی
- رێکخراوی ئاماژە بۆ گەشەپێدانی مرۆیی
- رێکخراوی مەسەلە (المسلة) بۆ پەرەپێدانی توانا مرۆییەکان
- یەکێتیی ژنانی کوردستان
- یەکێتیی ئافرەتانی کوردستان
- رێکخراوی (ئینما) بۆ پەرەپێدانی مرۆیی
- رێکخراوی (موڤ سەنتەر) بۆ پرسەکانی مافی مرۆڤ
- رێکخراوی تواناسازیی ئافرەت
- سەنتەری (میترۆ) بۆ ئازادی رۆژنامەگەری
- تۆڕی (هاوپەیمانیی 19) بۆ ئازادی رادەربڕین
