رووداو دیجیتاڵ
ئورسولا ڤۆن دێر لاین، سەرۆکی کۆمیسیۆنی ئەورووپا، داوا لە هەموو لایەنەکان دەکات دانبەخۆیاندا بگرن و کار بۆ هێورکردنەوەی گرژییەکانی نێوان ئێران و ئیسرائیل بکەن.
ڤۆن دێر لاین لە پۆستێکدا لە تۆڕی کۆمەڵایەتیی ئێکس رایگەیاند، لە پەیوەندییەکی تەلەفۆنیدا لەگەڵ ئیسحاق هێرزۆگ، سەرۆکی ئیسرائیل پشتگیریی یەکێتیی ئەورووپای بۆ مافی ئیسرائیل لە بەرگریکردن لە خۆی و پاراستنی هاووڵاتییانی دووپاتکردووەتەوە.
لە هەمان کاتدا، سەرۆکی کۆمیسیۆنی ئەورووپا جەختیکردووەتەوە، "پاراستنی سەقامگیریی ناوچەیی زۆر گرنگە."
خانمە سەرۆکی کۆمیسیۆن نووسیویەتی: "داوا لە هەموو لایەنەکان دەکەم بەوپەڕی دانبەخۆداگرتنەوە مامەڵە بکەن و کار بۆ هێورکردنەوەی دۆخەکە بکەن."
هەروەها دەشڵێت: "هەوڵە دیپلۆماسییەکان بۆ رێگریکردن لە زیادبوونی گرژی یەکلاکەرەوەن."
ئەم لێدوانەی سەرۆکی کۆمیسیۆنی ئەورووپا لە کاتێکدایە کە گرژییەکانی رۆژهەڵاتی نێوەڕاست گەیشتوونەتە لووتکە.
دوای ئەوەی ئیسرائیل هێرشێکی بەرفراوانی کردە سەر بنکە ئەتۆمی و سەربازییەکانی ئێران و بووە هۆی کوژرانی دەیان کەس، لەنێویاندا فەرماندەی باڵا، ئێران بە چەندین زنجیرە هێرشی مووشەکی وەڵامی دایەوە.
هێرشەکانی ئێران بوونەتە هۆی کوژرانی ژنێک و برینداربوونی دەیان کەسی دیکە لە ئیسرائیل، هەروەها زیانی ماددیی گەورەی لێکەوتووەتەوە.
کۆمەڵگەی نێودەوڵەتی نیگەرانیی قووڵی خۆی دەربڕیوە و داوای دانبەخۆداگرتن دەکات بۆ رێگریکردن لە پەرەسەندنی زیاتری شەڕەکە.
