رووداو دیجیتاڵ
بەڕێوەبەری بەرگریی شارستانیی سۆران رایگەیاند، ئەمڕۆ زیاتر لە 250 کارمەندی هەولێر، سۆران و ئاکرێ بەردەوام بوون لە گەڕان بەدوای تەرمی ئاڤێستادا، بەڵام پێشبینی دەکەن تەرمەکەی هێشتا لەژێر ئاودا بێت.
رۆژی یەکشەممە، 13ـی نیسانی 2025، کاروان میراودەلی، بەڕێوەبەری بەرگریی شارستانیی سۆران بە تۆڕی میدیایی رووداوی راگەیاند، "لە هەوڵەکانمان بۆ دۆزینەوەی ئاڤێستا بەردەوامین، بەڵام بەهۆی ساردیی رووبارەکە تاوەکو نزیکەی دوو هەفتە تەرمەکە دەمێنێتەوە و ئاوەکە هەڵی نادات، بۆیە پێشبینی دەکەین تەرمی ئاڤێستا هێشتا لەژێر ئاو بێت."
وەک بەڕێوەبەری بەرگریی شارستانیی سۆران دەڵێت، هەفتەی یەکەمیان تێپەڕاندووە و خەریکن پێدەنێنە هەفتەی دووەم، ئەمڕۆ 64 تیمی هەولێر، سۆران، ئاکرێ، بەغدا و پارێزگای سەلاحەدین کە زیاتر لە 250 کارمەند بوون لە گەڕان بەردەوام بوون.
ئاڤێستا یوسف بەرزنجی، تەمەن 27 ساڵ، دانیشتووی هەولێر، کاژێر 09:50ـی بەیانیی رۆژی 5ـی نیسانی 2025 کەوتە نێو رووباری تەنگاتوور لە قەزای مێرگەسۆر و تاوەکو ئێستا بێسەروشوێنە.
