رووداو دیجیتاڵ
کەمێک لەمەوپێش لە هەولێر کەسێک تەقە لە ماڵی خەزووری دەکات و بەپێی زانیارییە سەرەتاییەکان، چوار کەس دەکوژێت و یەکێکی دیکەش بریندار دەکات.
بەگوێرەی زانیارییەکانی تۆڕی میدیایی رووداو، رووداوەکە کاژێر 09:30ـ روویداوە و تەقەکەرەکە پزیشکێکە بەناوی (س. م).
بەگوێرەی پەیامنێری رووداو، چوار کەس لە ئەنجامی تەقەکردنەدا کوژراون، کە هاوژینەکەی، خوشکی هاوژینەکەی و خەسوو و خەزووری بکوژەکەن و کەسێکی دیکەش بریندارە. بەگوێرەی پزیشکەکان دۆخی تەندروستیی بریندارەکەش جێگیر نییە.
ئەو کەسانەی گیانیان لەدەستداوە، کەمال خدر مستەفا، خەزووری بکوژەکە، سەعادەت، خەسووری بکوژەکە، دکتۆرە سەنا، خێزانی بکوژەکە و سەناریا، خوشکی خێزانی بکوژەکەن.
کەسوکاری تەقەکەرەکە دەڵێن، پزیشکەکە هیچ کێشەیەکی دەروونی نەبووە. دکتۆرەکە ماوەیەک لەمەوبەر لەگەڵ هاوژینەکەی کێشەیەک کەوتووەتە نێوانیان و بەوهۆیەوە هاوژینەکەی چووەتەوە ماڵی باوکی. شایەتحاڵێک دەڵێت، "هاوژینەکەی داوای جیابوونەوەی کردووە و دکتۆرەکەش بەرگەی نەگرتووە و ئەمشەو ئەم رووداوەی لێکەوتوەتەوە."
دراوسێکانی ئەو ماڵە دەڵێن، ئەمشەو دکتۆرەکە سەردانی ماڵی خەزووری کردووەو گوێبیستی دەمەقاڵێیەکی تووند بوون، دکتۆرەکە ماڵی خەزووری جێهێشتووە و دوای چەند کاژێرێک گەڕاوەتەوە و رووداوەکە روویداوە.
ئاسایشی هەولێر لە راگەیێندراوێکدا ئاماژەی بەوە کرد، رووداوەکە بەهۆی کێشەی کۆمەڵایەتییەوە بووە و ئەو پزیشکە بە دەمانچە تاوانەکەی ئەنجامداوە.
تەقەکەرەکە لەلایەن پۆلیس دەستبەسەرکراوە. هەروەها تەرمەکان رەوانەی دادپزیشکی کراون.
