رووداو دیجیتاڵ
وەزارەتی جەنگی ئەمریکا (پێنتاگۆن) رایگەیاند، لە پێداچوونەوە بە هێزەکانیان لە عێراق بەردەوامن و بەپێی پێویست گۆڕانکاری لە پێکهاتەیان دەکەن. راشیگەیاند، پابەندن بە کۆتایی هێنانی ئەرکی سەربازی لە عێراق لە ئەیلوولی 2026.
رۆژی چوارشەممە 10-09-2025 وەزارەتی جەنگی ئەمریکا (پێنتاگۆن) لە وەڵامی پرسیاری دیار کوردە، بەرپرسی نووسینگەی رووداو لە واشنتن، لەبارەی هێزەکانی خۆیان لە عێراق گوتی: "بەپێی پێویست گۆڕانکاری لە هێزەکانمان دەکەین. ئێمە بە کۆتاییهێنان بە ئەرکی سەربازیی هاوپەیمانان لەنێو عێراقدا تاوەکو مانگی ئەیلوولی 2025 پابەندین و لە پشتیوانیکردنی ئۆپەراسیۆنەکانی دژی داعش لە سووریا لە بنکەکانی عێراقەوە تاوەکو مانگی ئەیلوولی 2026 بەردەوام دەبین."
پێنتاگۆن راشیگەیاند، دوای گواستنەوەکە، ویلایەتە یەکگرتووەکانی ئەمریکا لە پەیوەندییەکی هاوکاریی ئەمنیی دوولایەنە لەگەڵ عێراق بەردەوام دەبێت.
رۆژی 25-08-2025 سەرچاوەیەکی باڵای ئەمنیی عێراق بە رووداوی راگەیاند، جووڵەی هێزەکانی ئەمریکا لە بنکە سەربازییەکانی عێراقدا دەستیپێکردووە. "کشانەوەی هێزەکان لە بنکەی عەین ئەسەد و بەغداوە دەستپێدەکات و ئاراستەی جووڵەکە بەرەو هەرێمی کوردستان دەبێت."
لە وەڵامی پرسیاری رووداودا سەبارەت بە راپۆرتەکان لەسەر کشانەوەی هێزەکانی ئەمریکا لە بنکەکانی عەین ئەسەد لە ئەنبار و ڤیکتۆریا لە بەغدا، سەرچاوەیەکی باڵای ئەمنی عێراقی گوتی: "بەگوێرەی رێککەوتنی نێوان عێراق و هاوپەیمانی نێودەوڵەتی، کشانەوەکە لە کۆتایی مانگی ئەیلوولەوە لە بنکەی عەین ئەسەد و بەغداوە دەستپێدەکات."
سەرچاوەکە جەختی لەوەشکردەوە، ئەو جموجووڵانەی ئێستا لە بنکەکاندا هەن، ئامادەکارین بۆ پرۆسەی کشانەوەکە و رایگەیاند: "کشانەوەکە بەرەو هەولێر دەبێت، نەک وڵاتانی دەوروبەر."
