رووداو دیجیتاڵ
پەیامنێری رووداو رایدەگەیێنێت، فڕۆکەیەکی بێ فڕۆکەوان ئۆتۆمبێلێکی لە سنووری گوندی چەمی سەیدان لە قەرەهەنجیری سەر بە کەرکووک بۆردوومان کردووە و بەهۆیەوە سێ کوژراون.
نزار جەزا، پەیامنێری تۆڕی میدیایی رووداو کە قسەی لەگەڵ بەرپرسێکی ئیداریی سنوورەکە کردووە و زانیاریی پێدراوە، رایگەیاند، بۆردوومانەکە کاژێر 06:30ـی ئێوارەی ئەمڕۆ هەینی، 10-03-2023، بووە، بەهۆیەوە سێ کەس کوژراون.
هاوکات هیوا حوسامەدین، پەیامنێری رووداو رایگەیاند، فڕۆکە بێ فڕۆکەوانەکە ئۆتۆمبێلێکی جۆری توێتای کردووەتەوە ئامانج کە سێ کەسی تێدا بووە، هێرشەکە لەنێوان چەمچەماڵ و کەرکووک بە دیاریکراوی لە باکووری قەرەهەنجیرە بووە.
بەگوێرەی زانیارییەکانی پەیامنێری رووداو کە قسەی لەگەڵ چەند فەرماندەیەکی لیوای یەکی هێزەکانی پێشمەرگە کردووە، چەند بارەگایەکی پەکەکە لەو سنوورە هەن، لەنێوان کاژێر 06:30 تاوەکو 07:00ـی ئێوارە ئۆتۆمبێلەکە بۆردوومان کراوە و سێ کەسی تێدا بووە و هەرسێکیان کوژراون.
هیوا حوسامەدین، پەیامنێری رووداو باسی لەوەش کرد، تاوەکو ئێستا ناسنامەی کوژراوانی بۆردوومانەکە دیار نییە.
