رووداو دیجیتاڵ
لە شاری هەولێر، مەسرور بارزانی و عەمار حەکیم کۆبوونەوە، لە کۆبوونەوەکەدا سەرۆکوەزیرانی هەرێمی کوردستان رایگەیاندووە، پێویستە هەرێمی کوردستان وەکو قەوارەیەکی دەستووری و فیدراڵی مامەڵەی لەگەڵدا بکرێت. سەرۆکی رەوتی نیشتمانیی حیکمەش رایگەیاندووە، دەرفەتێکی "باش" بۆ چارەسەرکردنی کێشەکان هەیە.
رۆژی دووشەممە 9ـی ئۆکتۆبەری 2023، مەسرور بارزانی، سەرۆکی حکومەتی هەرێمی کوردستان و عەمار حەکیم، سەرۆکی رەوتی حیکمە لە شاری هەولێر کۆبوونەوە. بەگوێرەی راگەیێندراوێکی حکومەتی هەرێمی کوردستان، لە کۆبوونەوەکەدا گفتوگۆ لەبارەی دوایین گۆڕانکاری و پێشهاتەکانی دۆخی عێراق و ناوچەکە و پێویستی و گرنگیی چارەسەرکردنی کێشەکانی نێوان هەرێمی کوردستان و حکومەتی فیدراڵدا کراوە.
حکومەتی هەرێمی کوردستان رایگەیاندووە، لە کۆبوونەوەکەدا سەرۆکوەزیرانی هەرێمی کوردستان جەختی کردەوە، کە: "ئەگەر نیازپاکی هەبێت چارەسەرکردنی سەرجەم کێشەکان سەخت نین؛ پێویستە وەکو قەوارەیەکی دەستووری و فیدراڵی و لە چوارچێوەی دەستووردا، مامەڵە لەگەڵ هەرێمی کوردستان بکرێت".
بەگوێرەی راگەیێندراوەکەی حکومەتی هەرێمی کوردستان، عەمار حەکیم لە کۆبوونەوەکەدا ئاماژەی بەوە کردووە، سەردانی ئەم دواییەی سەرۆکی حکومەت بۆ بەغدا، رۆڵێکی گرنگ و ئەرێنی لە روونکردنەوەی بابەتەکانی پەیوەندیدار بە کێشەکانی نێوان هەرێمی کوردستان و حکومەتی فیدرال هەبووە. راشیگەیاندووە: "ئێستا دەرفەتێکی باش بۆ چارەسەرکردنی کێشەکان لە رێگەی گفتوگۆ و بەهێزکردنی متمانە و لەسەر بنەمای ڕێککەوتنەکان و دەستوور هەیە".
