هەڵەیەک روویدا! دووبارە هەوڵبدە
زێی گەورە. وێنە: رووداو
رووداو دیجیتاڵ
لە سنووری قەزای خەبات لە سێ شوێنی جیاوازدا سێ کەس لە زێی گەورەدا خنکان.
سەردار ئیسماعیل، لە تیمی ژێر ئاویی بەرگریی شارستانیی خەبات دەڵێت، "لە کاژێر 4:00ی پاش نیوەڕۆ پەیوەندییان پێوەکردین کە لە گوندی زەنگەر هاونیشتیمانییەک خنکاوە و تیمەکانمان هاتوون و لە گەڕان بەردەوامن، تەرمێکیشمان لە کەورگۆسک دۆزییەوە و تیمەکانمان لە گوندی مەنداوە سەرقاڵی گەڕانن بەدوای تەرمەکانی دیکەدا."
یەکێک لە خنکاوەکان ناوی رۆکان عەبدولباقییە، کچێکی تەمەن 17 ساڵ و دانیشتووی دارەشەکران بووە؛ خنکاوی دووەم نامیق جەبار، تەمەنی 40 ساڵە و دانیشووی شاوێس بووە و خنکاوی سێیەم عەبدولسەلام سەباح، تەمەن 13 ساڵ دانیشتووی گەڕەکی مامزاوای هەولێر بووە.
عەبدولسەلام لەگەڵ باوک، مام و دوو براکەی بۆ مەلەکردن روویان لە رووبارەکە کردبوو. عەبدوسەلام بۆ خۆی مەلەی نەزانیوە و زۆر نەچووەتە قووڵایی ئاوەکە، بەڵام کاتێک دەبینێ کە براکانی لە ناوەندی ئاوەکە خەریکن بخێنکێن، دەچێت تا یارمەتییان بدات بەڵام بۆخۆی دەخنکێت.
یوسف شاکر، مامی عەبدولسەلامە، باسی ساتی رووداوەکە دەکات و لە شوێنی رووداوی خنکانەکە بە رووداوی گوت، "ئێمە لێرە مەلەوانیمان دەکرد، سێ برازام بوون، یەکێکیان پێی کەوتە خوارێ و ژێرئاو کەوت، برا گەورەکەی لە دوای ئەو چوو و برا بچووکەکەی کە عەبدولسەلام بوو بەدوای ئەودا رۆیشت. ئێرە زۆر قووڵ نەبوو بەس لەولا حەفارە لێیدابوو و ئێمە نەمانزانیبوو، پێشتر چەند جار هاتبووین و تووشی رووداوی وانەببووین."
تا کاتی ئامادەکردنی ئەم راپۆرتە لە رۆژی هەینی 8ـی ئەیلوول، تەرمی عەبدولسەلام و نامیق جەبار نەدۆزرایەوە. بەگوێرەی ئامارەکان لە سەرەتای ئەمساڵەوە تا کۆتایی مانگی رابردوو، 27 کەس لە سنووری پارێزگای هەولێر لە ئاودا خنکاون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ