رووداو دیجیتاڵ
وەزارەتی پەروەردەی عێراق دەڵێت، پارێزگای موسەننا یەکەم و دهۆکیش دووەمە لە زۆریی رێژەی نەخوێندەوارییدا لە عێراق.
کەریم سەید، گوتەبێژی وەزارەتی پەروەردەی عێراق رۆژی 9ـی ئەیلوولی 2023، بە تۆڕی میدیایی رووداوی راگەیاند، "هۆبەی نەهێشتنی نەخوێندەواری لە بەڕێوەبەرایەتیی پەروەردەی هەموو پارێزگاکان هەیە. وەزارەتی پەروەردە هەڵمەتێکی بۆ گۆڕانکاریکردن لە هەندێک یاسا هەیە بۆ هاندانی بەتەمەنەکان تاوەکو فێری خوێندەواری بن؛ هەروەها ژنانیش فێری خوێندنەوە و نووسین و پیشەی دەستی دەکرێن".
کەریم سەید ئاماژەی بەوەکرد، رێژەی نەخوێندەواری لە عێراق لەم چەند ساڵەی دواییدا کەمبووەتەوە و ئاماژەی بەوە کرد، لە ساڵی 2010دا رێژەی نەخۆێندەواری لەسەر ئاستی عێراق 20٪ بوو، بەڵام بەپێی داتاکانی وەزارەتی پلاندانی عێراق، ئامارەکە لە ساڵی 2022دا بۆ 12٪ دابەزیوە.
لەبارەی نەخوێندەواریی دانیشتووانی پارێزگاکان، گوتەبێژی وەزارەتی پەروەردەی عێراق بە رووداوی گوت، "پارێزگای موسەننا لە زۆریی رێژەی نەخوێندەوارییدا یەکەمە لە عێراق کە 20٪ـی دانیشتووانەکەی نەخوێندەوارن؛ دواتر پارێزگای دهۆک دێت کە 18٪ـی دانیشتووانەکەی نەخوێندەوارن".
گوتەبێژی وەزارەتی پەروەردەی عێراق گوتیشی، رێژەی نەخوێندەواری لەنێو رەگەزی مێ 22٪ و لەنێو رەگەزی نێریش 13٪یە و ئاماژەی بەوەشکرد، رێژەکە لە گوندەکان 25٪ە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ