کەشناسی: ئەمڕۆ باران دەبارێت

رۆژی سێشەممە، 09-01-2024، بەشی کەشناسی لە وەزارەتی گواستنەوە و گەیاندن رایگەیاند، پێشبینی دەکرێت ئەمڕۆ ئاسمان نیمچە هەور و هەوری تەواو بێت و لەناوچە شاخاوییە بەرزەکانیش نمەباران ببارێت.

کەشناسی دەڵێت، پێشبینى بارانبارین لە سنوورى پارێزگاکان بەم شێوەیە دەبێت: لە سنوورى پارێزگاى دهۆک لەدواى نیوەڕۆ، لە بەشێک لە ئامێدى و ئاکرێ و بامەڕنێ دەبارێت، لە سنوورى پارێزگاى هەولێر لە ئێوارەدا لە بەشێک لە ناوچە جیاجیاکانى سنوورى سۆران و چۆمان پاشان بارانبارین درێژدەبێتەوە بۆ سنوورى شەقڵاوە و هیران و لەم ناوچانە ئاستى دابارین مامناوەند دەبێت، لە سنوورى پارێزگاى سلێمانى، کەرکووک و هەڵەبجە ئەگەرى نمەبارانى کەم هەیە.

لەبارەی بەفربارین، کەشناسی دەڵێت، لەناوچە شاخاوییە سنوورییەکان و لووتکەى شاخە بەرزەکان، ئەگەرى کەمێک بەفربارین هەیە، پلەی گەرماش نزیک دەبێتەوە لە تۆمارکراوەکانی دوێنێ.

لەبارەی کەشوهەوای سبەی چوارشەممە، کەشناسی پێشبینی دەکات، ئاسمان نیمچەهەور و هەورى تەواو بێت، ئەگەرى نمەباران لە هەندێک ناوچە و هەندێک کات هەیە، لە کاتى بارانبارین لە ناوچە شاخاوییە سنوورییەکان و بەرزەکان ئەگەرى بەفربارینیش هەیە.

رۆژی دووشەممە، 8ـی ئەم مانگە، محەممەد کەمال، شارەزایەکی کەشناسی بە تۆڕی میدیایی رووداوی گوت: "بەگوێرەی پێشبینییەکان لە رۆژی چوارشەممەوە، 10ـی ئەم مانگە شەپۆلێکی بارانبارین هەرێمی کوردستان دەگرێتەوە و لە هەندێک شوێن نزیکەی 140 ملیم باران دەبارێت، وەکو ناوچە کوێستانییەکانی سلێمانی، قەڵادزی و رانیە. بەگشتیش زۆرترین باران لە سنووریی ئیدارەی راپەرین دەبێت کە رەنگە بگاتە 170 بۆ 180 ملیم."

بە گوتەی ئەو شارەزای کەشناسییە، "کاریگەریی بارانبارین لە نێوان چوارشەممە و پێنجشەممە زیاتر دەبێت و دووبارە پێشبینی بەرزبوونەوەی ئاستی ئاو دەکرێت، بەتایبەتی لە سنووری ئیدارەی راپەرین و سۆران، دەورووبەری هەولێر و سلێمانی."

محەممەد کەمال گوتیشی، ئەو شەپۆلە بارانبارینەی هەرێمی کوردستان دەگرێتەوە تاوەکو 15 مانگ بەردەوام دەبێت و رەنگە تاوەکو 16 مانگیش بەشێوەی پچڕپچڕ بەردەوام بێت.

هەولێر:  15 پلەى سیلیزى

سلێمانی: 14  پلەى سیلیزى

دهۆک: 14 پلەى سیلیزى

کەرکووک: 16 پلەى سیلیزى

هەڵەبجە: 14 پلەى سیلیزى

زاخۆ: 15 پلەى سیلیزى

گەرمیان: 18 پلەى سیلیزى

حاجی ئۆمەران: 9 پلەى سیلیزى

سۆران : 12 پلەى سیلیزى