رووداو دیجیتاڵ
عەبیر سەهلانی، ئەندامی پەرلەمانی یەکێتیی ئەورووپا، رۆڵی نێچیرڤان بارزانی لە پشتیوانیکردنی ئازادیی رادەربڕین و کۆمەڵگەی مەدەنی بەرز دەنرخێنێت و دەڵێ، سەرۆکی هەرێمی کوردستان دەتوانێ ببێتە "سەرکردەیەکی راستەقینە بۆ تەواوی ناوچەکە، نەوەک تەنیا بۆ کورد."
عەبیر سەهلانی لە لێدوانێکدا پیرۆزبایی لە هەوڵ و پشتیوانییەکانی سەرۆکی هەرێمی کوردستان بۆ میدیای ئازاد کرد و رایگەیاند: "بەڕێزیان دەتوانێ ببێتە سەرکردەیەکی راستەقینەی تەواوی ناوچەکە، نەوەک تەنیا بۆ کورد، بەڵکو بۆ عێراقییەکانیش لە عێراق و هەموو نەتەوەکانی دەوروبەری عێراق."
پەرلەمانتارەکەی یەکێتیی ئەورووپا هۆکاری ئەم بۆچوونەی گەڕاندەوە بۆ ئەو جۆرە سەرکردایەتییەی رۆژهەڵاتی نێوەڕاست پێویستی پێیەتی و گوتی: "ئەگەر شتێک هەبێ لە رۆژهەڵاتی نێوەڕاستدا پێویستمان پێی بێ، سەرکردەیەکی راستەقینەیە باوەڕی بە مرۆڤ هەبێت، باوەڕی بەوە هەبێ کە مرۆڤەکان بە ئازادی لەدایکبوون و ئازادی لە راستیدا شکۆمەندییە و پابەند بێ بە شکۆمەندیی گەلەکەی خۆی و گەرەنتیی شکۆمەندیی گەلانی دیکەش بکات."
سەهلانی، کە لە ساڵی 2012دا کاتێک نێچیرڤان بارزانی، سەرۆکوەزیران بووە چاوی پێی کەوتووە، گوتی: "دەبینم کە بەڕێز نێچیرڤان بارزانی بەڕاستی خاوەنی ئەو توانایەیە و هیوادارم بتوانێت بەم گەشتەدا تێپەڕێت."
عەبیر سەهلانی پشتیوانیی پەرلەمانی ئەورووپا بۆ هێزە دیموکراسییەکانی هەرێمی کوردستان دووپات دەکاتەوە و دەڵێ: "هەموو هێزە ئەرێنی و دیموکراسییە ئازادەکان لە کوردستان دەتوانن هەمیشە پشت بە پشتیوانیی ئەورووپا لە پەرلەمانی ئەورووپا ببەستن. ئێمە هەمیشە لەگەڵتان دەوەستین."
