پۆلیسی سلێمانی: شەڕ لە نێوان دوو خوێندکاری زانکۆی پۆلیتەکنیکی روویدا و دوو کەس بریندار بوون

ئەمڕۆ پێنجشەممە 05ـی کانوونی یەکەمی 2024، سەرکەوت ئەحمەد، گوتەبێژی پۆلیسی سلێمانی بە تۆڕی میدیایی رووداوی راگەیاند، "لە زانکۆی پۆلیتەکنیکی سلێمانی شەڕ لە نێوان خوێندکارێک و برای خوێندکارێکی دیکە روویدا بەهۆیەوە هەردووکیان بریندار بوون، بەڵام تەندروستییان جێگیرە."

گوتەبێژی پۆلیسی سلێمانی گوتی، شەڕەکە لە بەردەم پرسگەی زانکۆکە روویداوە و چەکیان بەکارنەهێناوە. "تاوەکو ئێستا هۆکاری شەڕەکە دیار نییە، بەڵام لێکۆڵینەوە بەردەوامە."

هاوکات بەختیار عوبێد، یاریدەدەری سەرۆکی زانکۆی پۆلیتەکنیکی سلێمانی بە رووداوی گوت، "ئەو شەڕە لە نێوان دوو خوێندکار روویداوە، بەڵام ئێمە بە کاری خۆمان هەڵدەستین، رێکاری کارگێریان بەرامبەر دەگرینەبەر و رادەستی لیژنەی جڵەوگیری زانکۆیان دەکەین."

هەر وەک لە گرتە ڤیدۆییەکاندا دەردەکەوێت، دوو قوتابی بە ئاسن هێرشدەکەنە سەر یەکدی، چەند کەسێکی دیکەش دەردەکەون کە شەڕدەکەن لەگەڵیان.

بەختیار عوبێد دەڵێت: "لە دەرەوەی زانکۆ پەیوەندییان بە هاوڕێکانیانەوە کردووە ئەوانیش چوونەتە نێو شەڕەکە."

شایەتحاڵێک کە خوێندکاری زانکۆی پۆلیتەکنیکی سلێمانییە، لەبارەی شەڕەکەوە بە پەیامنێری رووداوی گوت، ''شەڕەکە کاژێر 11:45 خولەک دەستیپێکرد، دواتر تەلەفۆنێکمان بۆ هات کە برادەرێکی خۆمان بە سەختی لە شەڕەکەدا بریندار بووە.''

ئەو شایەتحاڵە ئاماژەی بەوە کرد، ''ئەو شەش کەسەی لە دەرەوەی زانکۆوە هاتن، خوێندکار نەبوون، بەڵکو برادەری یەکێک لە خوێندکارەکان بوون و هاتنە ژوورەوە و ئاڵۆزییان دروست کرد.''

وەک ئەو شایەتحاڵە دەڵێت، ئەو کەسانەی چوونەتە نێو حەوشەی زانکۆوە، ''چەکوش، چەقۆ، ئاسن و داریان پێبوو و هێرشیانکردە سەر خوێندکاران، ئەوانیش بە دەستی بەتاڵەوە بەرگرییان لە خۆیان کرد.''