لۆگۆی هەردوو حکومەتی هەرێمی کوردستان و حکومەتی عێراق
رووداو دیجیتاڵ
نوێنەری حکومەتی هەرێمی کوردستان لە یەکێتیی ئەوروپا دەڵێت، پەرلەمانی یەکێتیی ئەوروپا لە قووڵبوونەوەی کێشەی نێوان هەولێر و بەغدا نیگەرانە و گوتیشی، "راپۆرتێکمان بە ناوی حکومەتی هەرێمی کوردستانەوە داوەتە پەرلەمان و پەرلەمانتارانی یەکێتییەکە و کێشەکانمان بۆ روونکردوونەتەوە".
رۆژی پێنجشەممە، 05-10-2023، دلاوەر ئاژگەیی، نوێنەری حکومەتی هەرێمی کوردستان لە یەکێتیی ئەوروپا بە تۆڕی میدیایی رووداوی راگەیاند، "وەکو نوێنەرایەتیی حکومەت، چەند کۆبوونەوەیەکمان لەگەڵ لیژنە و پەرلەمانتارانی یەکێتیی ئەوروپا کرد و راپۆرتێکمان لەبارەی کێشەکانی نێوان هەولێر و بەغدا پێدان کە تێیدا سەرنج خراوەتەوە سەر پرسی راگرتنی نەوت، نەناردنی بودجە و ناوچە کوردستانییەکانی دەرەوەی ئیدارەی هەرێمی کوردستان و پابەندییەکانی هەرێمی کوردستانیش بە رێککەوتنەکان".
حکومەتی هەرێمی کوردستان و حکومەتی عێراق، لەسەر چەند پرسێک ناکۆکن و تاوەکو ئێستا ئەگەر رێککەوتنیشیان کردبێت، بەربەست لەبەردەم رێککەوتنەکە هەیە. دیارترین ناکۆکییەکان، (بودجەی گشتیی عێراق و پشکی هەرێمی کوردستان، نەوت، یاسای نەوت و گاز، ناوچە کوردستانییەکانی دەرەوەی ئیدارەی هەرێمی کوردستان).
دلاوەر ئاژگەیی گوتی، "وەرزی سەرما خەریکە ئەوروپا دەگرێتەوە و شەڕی رووسیا-ئۆکرایناش بەردەوامە، پەرلەمانی یەکێتیی ئەوروپا ترسی سەرهەڵدانی کێشەی سووتەمەنییانە و نیگەرانن لە راگرتنی هەناردەکردنی نەوتی هەرێمی کوردستان، هەروەها هەرێمی کوردستانیش بە بەربەستی بەردەم تیرۆر دەزانن بۆ ئەوروپا، بۆیە لە کۆبوونەوەکاندا بەردەوام جەخت لەسەر بەهێز مانەوەی هەرێمی کوردستانی عێراق دەکەنەوە".
نوێنەری حکومەتی هەرێمی کوردستان ئاماژەی بەوەکرد، سەرەڕای ئەوەی پەرلەمانی یەکێتیی ئەوروپا نووسینگەی نوێنەرایەتی لە بەغدا و هەولێریش هەیە، "بەڵام ئێمە داوامانکرد شاندێک بنێرنە عێراق و هەرێمی کوردستان بۆ ئەوەی خۆیان لە نزیکەوە بزانن کێشەکان چین و بۆچی چارەسەر نەکراون".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ