رووداو-هەولێر
ئەمڕۆ کەسێکی بەساڵاچوو لە ناحیەی دارەتوو لە شاری هەولێر کۆچی دواییکردووە و زیاتر لە 100 کەس ویستوویانە لە مزگەوت نوێژی لەسەر بکەن. دەستبەجێ هێزەکانی پۆلیس و زێرەڤانی گەیشتووەنەتە شوێنەکە و بڵاوەیان بە خەڵک کردووە.
پرسەکەی ئەمڕۆ لەکاتێکدایە کە بەهۆی پرسەیەک لە گەڕەکی کارێزانی هەولێر تاوەکو ئێستا 32 کەس تووشی ڤایرۆسی کۆرۆنابوون.
وەزیری تەندروستی ئەمڕۆ لە کۆنگرەیەکی رۆژنامەڤانیدا رەخنەی تووندی لەو کەسانە گرت کە پرسەکەیان داناوە و ئەوانەش کە بەشدارییان کردووە و گوتی: "دانانی پرسە سەرپێچی رێنماییەکان بوو. بەداخەوە کارێکی نایاسایی، نەگونجاو و دوور بوو لە رێکارەکانی تەندروستی".
هەروەها بەگوتەی وەزیری تەندروستی پرسەی دووەمیش دوای دوو رۆژ لە پرسەکەی کارێزان دانراوە و گوتەبێژی بەڕێوبەرایەتی گشتی تەندروستی هەولێر داوای لە بەشداربووانی پرسەکە کرد بەزووترین کات پەیوەندیی بە تیمەکانی تەندروستییەوە بکەن.
