رووداو دیجیتاڵ
لە کارگەیەکی پارێزگای ئامەدی باکووری کوردستان، شەڕە چەقۆ روویدا، لە ئەنجامدا کەسێك کوژرا و 12ـی دیکەش بریندار بوون، دواتر پێنج لە بریندارەکان دەستبەسەرکران.
رووداوەکە ئێوارەی رۆژی پێنجشەممە، 2ـی تشرینی دووەمی 2023 لە کارگەیەکدا لە شارۆچكەی بسمیلی سەر بە پارێزگای ئامەد روویداوە.
بە گوێرەی زانیارییەکان بە هۆکارێكی نادیار دەمەقاڵێ لە نێوان وەستای کارگەکە و کرێکاراندا روویدا و دواتر بووەتە شەڕیان. لە شەڕەکەدا کەسێك بە ناوی جەلال بە چەقۆ کوژراوە و 12ـی دیکەش بریندار بوون.
دوای گەیشتنی تیمەکانی جەندرمە و تیمی تەندروستی 12 بریندارەکە بە ئامبوڵانس رەوانەی نەخۆشخانەی دەوڵەت لە بسمیل کران و دواتر حەوت لە بریندارەکان گوازرانەوە نەخۆشخانەکانی شاری ئامەد.
لە چوارچێوەی لێکۆڵینەوەکانی داواکاری گشتیی بسمیل لە رووداوەکە، پێنج لەو کەسانەی لە شەڕەکەدا بریندار بوون دوای وەرگرتنی چارەسەر لە نەخۆشخانەی دەوڵەت لە بسمیل، لەلایەن تیمەکانی سەر بە فەرماندەیی جەندرمە دەستبەسەرکران.
