حەکیم قسە بۆ پەیامنێری رووداو دەکات
رووداو - هەولێر
لە بنەسڵاوەی هەولێر، ماڵە خەزوورێک هەڵدەکوتنە سەر ماڵی زاواکەیان بەهۆی ئەوەی ویستوویەتی ژنی دووەم بهێنێت. زاواکە کە ناوی حەکیمە دەڵێت، 23 ساڵە ژنی هێناوە و منداڵیان نابێت، هەربۆیە ئێستا دەیەوێت ژنی دووەم بهێنێت.
حەکیم لوقمان، زاوا دەڵێت، "23 ساڵە لێناگەڕێن ژن بهێنم، ماڵە خەزوورانم زووڵمم لێدەکەن." دوای رووداوەکەش حەکیم هەر کۆڵی نەداوە و دەڵێت، هەر ژنی دووەم دەهێنێت، "کە دەچمە داخوازیی کەسێک، دەڵێن: دەبێت ماڵی خەزووریشت بزانن."
ژنبرایەکی حەکیم دەڵێت، بە تەنیا چووەتە سەر ماڵی زاواکەیان و کێشەکەش مەسەلەی ژنهێنانی زاواکەیان نییە بەسەر خوشکەکەیدا، لەبەر ئەوەش چووە، چونکە بە تەلەفۆن "جنێوی بە باوکم دا" کە دوو ساڵە کۆچی دواییکردووە.
ئارام رەشاد، ژنبرای حەکیم دەڵێت، "ئەو لە ماڵ نەبوو، دوای ئەوە ئەو دەڵێت، بە چەند کەسێک بۆ من هاتوون. ئەوە کامێرا هەیە و دراوسێکانیش منیان بینی، چەکیشم پێ نەبوو، بە لەقە جامەکەم شکاندووە."
خێزانەکەی حەکیم ماوەی مانگێکە ماڵی جێهێشتووە و لە ماڵی باوکیەتی، دەڵێت، کێشەکە لە حەکیمە کە منداڵیان نابێت، سەردانی زیاتر لە 10 پزیشکیان کردووە و هەموو چارەسەرەکان بۆ حەکیم بوون نەک ئەو.
هاوژینی حەکیم ئاماژە بەوە دەکات، "گوتم دکتۆر ئەگەر ژن بۆ پیاوەکەم بهێنم، هیوایەک هەیە منداڵی ببێت؛ دکتۆر گوتی، 5%. من هیچ چارەسەرێکم بەکارنەهێناوە، چونکە پێویستم پێی نەبووە."
بەپێی بەدواداچوونەکانی رووداو، حەکیم پێشتر لە ئێران نەشتەرگەریشی بۆ ئەنجام دراوە، بەڵام دەیەوێت بۆ منداڵبوون، بەختی خۆی لەڕێگەی ژنی دووەمەوە تاقی بکاتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ