رووداو دیجیتاڵ
فەرماندەی هێزی پاسەوانی سنووریی پارێزگای سنەی رۆژهەڵاتی کوردستان رایگەیاند، لە رووبەڕووبوونەوەیەک لەگەڵ ژمارەیەک چەکداری "گرووپێکی دژبەری کۆماری ئیسلامی ئێران" لەسەر سنووری شاری بانە، سەربازێک کوژرا و سێ کەسی دیکەش بریندار بوون.
بەپێی ئاژانسی هەواڵی تەسنیم کە سەر بە سوپای پاسدارانە، رۆژی پێنجشەممە، 02-05-2024، محەممەد عارف سپێهری، فەرماندەی هێزی پاسەوانی سنووریی پارێزگای سنە رایگەیاند، لە رووبەڕووبوونەوەیەکی چەکداریدا لە ناوچەی سنووریی هەنگەژاڵی بانە، سەربازێکی ئێران کوژرا و دوو سەربازی دیکەش لەگەڵ کارمەندێک بریندار بوون.
محەممەد عارف سپێهری گوتی: "شەوی رابردوو لە کاتی کۆنترۆڵکردن و پاراستنی هێڵی سنوور لەو ناوچەیە لە نێوان هێزەکانی پاسەوانی یەکەی پاسەوانیی بانە و گرووپێکی دژبەر رووبەڕووبوونەوەکە روویداوە، سەربازەکان بە شێوەیەکی بەهێز و بوێرانە رووبەڕوویان بوونەتەوە. هێرشەکە تێکشکێندرا و هەوڵەکان بۆ دەستبەسەرکردنیان بەردەوامە."
گوتیشی، لە رووبەڕووبوونەکەدا سەربازێک کوژرا و دوو سەرباز و ستافێکی بنکەی سەربازی هەنگەژاڵ بریندار بوون.
فەرماندەی هێزی پاسەوانی سنووری پارێزگای سنە دەڵێت، ئەو سەربازی لە رووبەڕووبوونەوەکەدا کوژراوە، ناوی فەرزین بلیان-ە و خەڵکی شاری کرماشانە. بریندارەکانیش گوازراونەتەوە نەخۆشخانەی شاری بانە و چارەسەر وەردەگرن.
عەلی ئازادی، بەڕێوەبەری پۆلیسی پارێزگای سنە لە راگەیێندراوێکدا، رووداوەکەی سەر سنووری هەنگەژاڵی بانەی وەک "رووداوێکی تیرۆریستی" ناوزەند کرد و شەرمەزاری کرد.
تائێستا هیچ گرووپ و لایەنێک بەرپرسیاریێتی رووداوەکەی سنووری هەنگەژاڵی بانەی لە ئەستۆ نەگرتووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ