هەڵەیەک روویدا! دووبارە هەوڵبدە
رووداو دیجیتاڵ
بەشێکی زیندانییان لە چاکسازییەکان دەتوانن بە چەند مەرجێک، سێ مانگ جارێک مۆڵەتی چوونە ماڵەوە وەربگرن.
رۆژی چوارشەممە، 2ـی نیسانی 2025، تەیب عەبدولعەزیز، بەڕێوەبەری چاکسازیی ژنان و منداڵانی هەولێر بە تۆڕی میدیایی رووداوی راگەیاند، بەپێی مادەی 40ـی ساڵی 2008ـی فەرمانگەکانی چاکسازی و کۆمەڵایەتی لە هەرێمی کوردستان، بەشێکی سزادراون دەتوانن سێ مانگ جارێک داوای مۆڵەتی چوونە ماڵەوە بۆ 5 رۆژ بکەن.
لەبارەی مۆڵەت وەرگرتنی نەوجەوانانیش، بەڕێوەبەرەکە گوتی: "هەر شەش مانگ جارێک، دەتوانن 10 رۆژ داوای مۆڵەتی چوونە ماڵەوە بکەن."
وەک تەیب عەبدولعەزیز دەڵێت، "ئەم مۆڵەتە هەموو سزادراوان ناگرێتەوە. هەندێک تاوان هەن تاوانبارەکەیان ناتوانێ مۆڵەت وەربگرێت، وەک کوشتن، تاوانەکانی دژی ئاسایشی گشتیی هەرێمی کوردستان، تاوانی رفاندن و چەند تاوانێکی دیکە."
بەگوتەی بەڕێوەبەری چاکسازیی ژنان و منداڵانی هەولێر، ئەمساڵ تەنیا دوو کەس لە چاکسازییەکەیاندا ئەو مۆڵەتەیان وەرگرتووە.
هەروەها گوتی "کۆمەڵێک مەرج پێویستن بۆ ئەوەی سزادراو بتوانێت ئەم مۆڵەتە بکات. بۆ نموونە، دەبێت سزادراو یەک لەسەر چواری ماوەی حوکمەکەی تەواو کردبێت، لانیکەم یەک ساڵ لە فەرمانگەی چاکسازییەکان سزاکەی بەسەر بردبێت، پێویستە سزادراو مامەڵەی لەنێو چاکسازی باش بێت."
تەیب عەبدولعەزیز گوتیشی، پێویستە ماڵێکی نەگوازراوە واتە پارچە زەوییەک دابنرێت تاوەکو کەسەکە دەگەڕێتەوە نێو چاکسازی؛ "نابێت بەهای ئەو موڵکە لە 50 ملیۆن دینار کەمتر بێت؛ دەبێت بڕێک پارەی کاش وەک بارمتەی دارایی لە بانک دابنرێت، کە نابێت لە پێنج ملیۆن دینار کەمتر و لە 25 ملیۆن دینار زیاتر بێت، لەگەڵ دوو کەفیل، کە یەکێکیان دەبێ خزمی سزادراو بێت و دووەمیش دەبێ خەڵکی ئەو شارە بێت، کە سزادراوەکەی تێدا بەندکراوە."
تەیب عەبدولعەزیز گوتیشی، "نابێت ژیانی ئەو هاووڵاتییە بکەوێتە مەترسییەوە، واتە نابێ سزادراو هەڕەشە لەسەر ژیانی هەبێت کاتێك مۆڵەتەکە وەردەگرێت."
بەپێی ئامارەکانی چاکسازیی ژنان و منداڵانی هەولێر، 306 بەندکراو لە چاکسازییەکەدا هەن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ