رووداو دیجیتاڵ
کەمێک پێش ئێستا تەرمی یەکێک لەسێ گەنجە خنکاوەکانی ماوەت دۆزرایەوە کە ناوی هەڵکەوت نوورییە و خەڵکی هەولێرە، ئەو بۆ سەردان چووبووە ماڵی خەزووری و دوای خنکانی، لە چەمی قەشان - ماوەت تەرمەکەی دۆزرایەوە.
رۆژی شەممە 2-4-2022 کامەران حەسەن، قایمقامی ماوەت بە تۆڕی میدیایی رووداوی راگەیاند، تەرمی هەڵکەوت نووری لە گۆمی بەردەباز لە چەمی قەشان – ماوەت دۆزرایەوە.
قایمقامی ماوەت ئاماژە بەوە دەدات کە ئێستا بە رێگاوەن بۆ شوێنەکە، بەڵام شوێنەکە شیوێکی قوڵە، بۆیە بۆ دەرهێنانەوەی تەرمی گەنجەکە، پێویستیان بەفڕۆکەیە.
باسی لەئەوەشکرد، تیمی مەلەوانیی تەقتەق توانیویانە گەنجەکە بدۆزنەوە. پاش دەرهێنانەوەی، تەرمەکە دەبرێتە دادپزیشکی بۆئەوەی لێکۆڵینەوەی لەبارەوە بکەن.
لە ئێوارەی یەکەم رۆژی بەهار، سێ گەنج کە بەمەبەستی وێنەگرتن چووبوونە سەر چەمی قەشان – ماوەت بێسەروشوێنبوون، لەو ماوەیەوە تاوەکو ئێستا تیمە خۆبەخشەکان، خەڵکی ناوچەکە، تیمی فڕۆکەوانی و تیمی مەلەوانی بەدوای ئەو گەنجانەدا دەگەڕان.
دوایین وێنە و گرتەی ڤیدۆییان کە لە تۆڕی کۆمەڵایەتیی سناپچات بڵاوکراوەتەوە لەسەر ئەو چەمە بووە. کۆسار و دەروون خەڵکی گوندی بەرسماقی ماوەتن، هەڵکەوت و نووریش دانیشتووی هەولێرە و بۆ سەردان چووبووە ماڵی باوکی هاوژینەکەی.
.jpg&w=3840&q=75)
