رووداو دیجیتاڵ
ئەنجوومەنی ئاسایشی هەرێمی کوردستان دەڵێت، ئەو کەسەی هێرشی کردە سەر ئاهەنگی جەژنی ئەکیتۆ لە دهۆک، "هەڵگری بیروباوەڕی تیرۆریستیی سەر بە داعشە".
ئەمڕۆ سێشەممە، 01-04-2025، لە ئاهەنگی جەژنی ئەکیتۆ لە دهۆک، کەسێک بە ساتوور هێرشی کردەسەر دوو کەسی دیکە و برینداری کردن.
ئەنجوومەنی ئاسایش دەڵێت، "دەستبەجێ هێزەکانی سەر بە بەڕێوەبەرایەتیی ئاسایشی دهۆک کەسی هێرشبەریان دەستگیرکرد کە خەڵکی سووریایە".
ئاماژە بەوەش دەکات: "لێکۆڵینەوە لە سەر بابەتەکە بەردەوامە و لە دوای کۆتاییهاتنی، دەرەنجامەکان بۆ هاووڵاتییان و رای گشتی رادەگەیێنین".
جەژنی ئەکیتۆ، یان جەژنی سەری ساڵی بابلی- ئاشووری، دەکەوێتە یەکەمین رۆژی مانگی نیسانەوە. لەو جەژنەدا وەکو نەریتێک ساڵانە فێستیڤاڵ و چالاکیی جیاواز بەڕێوەدەچن. ئەمڕۆ لە کاتی یادکردنەوەی ئەم جەژنە لە دهۆک، کەسێک هێرشی کردە سەر ژنێک و گەنجێک و هەردووکیانی بریندار کرد.
جەژنی ئەکیتۆ ماوەی 12 رۆژ دەخایێنێت، جگە لە سەما و هەڵپەڕکێ، هاوشێوەی جەژنی نەورۆز، گەشت و سەیرانیشی تێدایە. لە هەرێمی کوردستان لە ساڵی 1992ـەوە کریستیانەکان ئەو جەژنە پیرۆز دەکەن.
هەر ئەمڕۆ، د. عەلی تەتەر، پارێزگاری دهۆک لە کۆنفرانسێکی رۆژنامەڤانیدا رایگەیاند، "بە تووندی سەرکۆنەی ئەم رەفتارە نامرۆڤانەیە دەکەین، کە کەسێکی تاوانبار ویستوویەتی بەم شێوەیە پێکەوەژیان لە کوردستان کۆتایی پێبێنێت، بەڵام هیچ کەسێک ناتوانێت، چونکە پێکەوەژیانی هەموو خوشک و برا کریستیانەکان، ئێزدییەکان، ئەرمەنییەکان و عەرەبەکان. رەگی لە دڵمان چەقیوە و وەکو چاومان پارێزگارییان لێدەکەین".
