فەرماندەی ئۆپەراسیۆنی دوورزییەکان لە سوێدا: رێگە بە هێزەکانی هەتەشە نادەین و داوای هەڵوێستی نێودەوڵەتی دەکەین

رووداو دیجیتاڵ 

 

 

بەها جەمال، فەرماندەی هۆبەی ئۆپەراسیۆنی دوورزییەکان لە سوێدا، ئەمڕۆ میوانی بووڵتەنی کاژێر 19:00 بوو و رایگەیاند، دوێنێ رێگەیان بە ‌هێزەکانی دەستەی تەحریری شام نەداوە، بێتە نێو پارێزگای سوێدا، دەشڵێت: "ئەو هێزە بە فێڵ و بە شێوەیەکی ناشیرین هاتنە ناوەوە بەبێ ئاگادارکردنەوەی کەس."

 

ئەو فەرماندەیەی هۆبەی ئۆپەراسیۆنی دوورزییەکان هۆشداریی بە بەرپرسانی شام دەدات و دەڵێت: "ئێمە رێگە بە هیچ رێکخراو و گرووپێک نادەین، هەرچەندە ژمارەی ئەندامەکانیشیان زۆر بێت، دەستوەربدەن لەو شوێنانەی ئێمە بوون و رۆڵمان هەیە تێیاندا لە باشووری سووریا بەگشتی".

 

 

 

بەها جەمال: دوێنێ هیچ هاوئاهەنگییەک لەگەڵ هیچ سەرکردەیەکی گرووپەکان لە ژووری ئۆپەراسیۆنەکان و شێخی عەقڵ نەکرا. بینیمان کات گونجاو نەبوو، خەڵکیش سەرقاڵی یادی سەری ساڵ بوون. بە فێڵ و بەشێوەیەکی ناشیرین هاتنە ناوەوە، بەبێ ئاگادارکردنەوەی کەس. ئێمە رەتیدەکەینەوە، سەرکردەی سەربازیمان هەن، بەڵام هاوئاهەنگی لەگەڵ تاک و کەسەکان دا ناکەین.

 

 

بەها جەمال: نا، یەکەم لەبەر نەبوونی هاوئاهەنگی، دووەم لەبەرئەوەی هێشتا هەندێک دۆخ ئارام نەبووەتەوە، نازانین چی لەسەر ئاستی سووریا بەگشتی روودەدات. ئێمە رێگە بە هیچ رێکخراو و گرووپێک نادەین، هەرچەندە ژمارەی ئەندامەکانیشیان زۆر بێت، دەستوەربدەن لەو شوێنانەی ئێمە بوون و رۆڵمان تێیاندا هەیە لە باشووری سووریا بەگشتی، لەبەرئەوە رێگە نادەین هیچ کەسێک هیچ بڕیارێکمان بەسەردا بسەپێنێت. پەیوەندی بە شێخی عەقڵ و شێخ سەلمان حیکمەت هاجری کرا و وەڵامەکەیان رەتکردنەوە بوو، جەختیان کردەوە کە لەم کاتەدا رێگە بە هیچ کەسێک نادەن دەستوەربدات. توانامان هەیە و سەرکردەی سەربازیمان هەن، کە دەتوانن ئاسایش بەڕێوەببەن و کۆنترۆڵی بکەن، لەبەرئەوە پێداگرین لەسەر هەڵوێستەکەمان.

 

 

بەها جەمال: سوێدا لەژێر کۆنترۆڵی شێخی عەقڵ و ژووری ئۆپەراسیۆنەکان و مەرجەعییەکاندایە. ئێمە لە پارێزگای سوێدا، لە پەیوەندییە کۆمەڵایەتییەکانی خۆماندا، گەورە بنەماڵەکانمان هەن، دیوەخانەکان و مەرجەعییەتمان هەیە کە کۆمان دەکەنەوە. دۆخەکە وەکو خۆیەتی، سوپاس بۆ خودا، بەگشتی هیچ شتێک نییە جێی نیگەرانیمان بێت. هێشتا پێویستمان بە داوای هاوکاری لە دەرەوە یان شتی لەو بابەتە نەبووە. دۆخەکە ئارام و سەقامگیرە، سوپاس بۆ خودا، وەک هەمیشەش رێگە نادەین کەس دەستوەردان بکات.

 

 

بەها جەمال: هەندێک بەڕێوەبەر کە پۆستەکانیان وەرگرتووە لەسەر کارەکانیانن، لیژنەکانی جووڵانەوەیان لەگەڵە، لەژێر سەرپەرشتی ژووری ئۆپەراسیۆنەکان و بەهاوئاهەنگی لەگەڵ کەسایەتییە پاکەکانی پارێزگاکە، ئێستا ئەوان کارەکان بەڕێوەدەبەن.

 

 

بەها جەمال: ئێمە ژمارەی ئەندامەکانمان یان کەلوپەلەکانمان یان جۆری چەکەکانمان ئاشکرا ناکەین، بەڵام سوپاس بۆ خودا، هیچ کاتێک چیا پێویستی بە کەس نەبووە و پشتیوان بە خودا هەرگیز وا نابێت.

 

 

بەها جەمال: گرنگترین شت لای ئێمە پاراستنی کەرامەتمانە، کەرامەتیشمان بە فەزڵی خودا پارێزراوە. سەبارەت بەم بابەتەش، زانیاریی تەواوم نییە لەسەری و تۆزێک چاوەڕێ دەکەم تاوەکو وردەکارییەکان وەردەگرم. نازانین هەندێک شت بەرەو کوێ دەچن. لەگەڵ ئەوەشدا، ئەگەر پێویست بێت و ئەگەر دەستدرێژی بکرێتە سەرمان یان شتێکمان بەسەردا بسەپێنرێت وەک پارێزگایەک، بەڵێ داوای فیدراڵی دەکەین.

 

 

بەها جەمال: نا، ئێمە ناچینە شەڕەوە و هەوڵی خوێنڕشتن نادەین. بەڵام ئەگەر شتێک بەسەرماندا بسەپێنرێت، ئێمە شۆڕشێک دەکەین لەسەر شۆڕش. ئێستا بیر لەمە ناکەینەوە، بەڵام ئەگەر شتێک بەسەرماندا بسەپێنرێت، بەڵێ، ئێمە ئامادەین بێ دوودڵی شۆڕش بکەین.

 

 

بەها جەمال: رێگە بە هیچ کەسێک نادەین بێتە خاکی چیا و شتێک بەسەرماندا بسەپێنێت، چ لەم لایەنەوە بێت یان لایەنێکی دیکەوە. هەرگیز بانگەشە بۆ خوێنڕشتن ناکەین.

 

 

بەها جەمال: لە سەرەتای قەیرانەکەوە، شێخی دامەزرێنەر، خودا لێی خۆش بێت، شێخ ئەبو فەهد، وەحید بەلعووس، داوای کرد نەچینە نێو سوپای رژێمەوە. ئێمە ناچینە نێو خوێنڕشتنەوە، چونکە خوێنی سوورییەکان حەرامە. تاوەکو ئەم ساتەش، بانگەشە بۆ خوێنڕشتن ناکەین و هانی نادەین، بەڵام کاتێک بە 50 ئۆتۆمبێلی پڕچەکەوە هاتن، مافی سرووشتیی خۆمانە بەرگری لە خۆمان و بوونمان بکەین. ئەمە شتێکی سرووشتییە و گفتوگۆی لەسەر ناکرێت.

 

 

بەها جەمال: ژمارەی چەکدار و جۆری چەکەکان تایبەتمەندیی خۆمانن. داوای لێبووردن دەکەم، ئەمە شتێکی تایبەتە بە ئێمەوە. ئێمە پشت بە پشتیوانیی ناوخۆیی پارێزگاکە دەبەستین و هیچ پشتیوانییەکی دەرەکیمان وەرنەگرتووە و داواشمان نەکردووە. تەنیا داوای پشتیوانی لە خەڵکی پارێزگاکە دەکەین و داوای هەڵوێستی نێودەوڵەتی دەکەین. سەبارەت بە پشتیوانی دەرەکی، داوامان نەکردووە.

 

 

بەها جەمال: پەیوەندی راستەوخۆ لەگەڵ شێخ سەلمان حکمەت هاجری هەبوو، باسی دانانی سەرکردە سەربازییەکان لە پارێزگاکە کرا، هەروەها هەڵبژاردنی کەسانی لێهاتوو بۆ بەڕێوەبردنی کارەکان و دانانی فەرماندەی پۆلیس لە خەڵکی پارێزگاکە. وەڵامەکە بە تەواوی رازیکەر نەبوو، ئێمە سنوورێکی ئایینی و کۆمەڵایەتیمان هەیە، رێزی لێدەگرین. وتەی شێخ لای ئێمە بەردەوامە و شێخیش پێگە و رێزی خۆی هەیە، وەڵامیان ئەوە بوو کە هاوئاهەنگییان کرد و هەوڵیان دا بچنە پارێزگاکە و پاشان گەڕانەوە. سەرەڕای ئەوەش، ئەمە مانای ئەوە نییە پەیوەندی لە نێوانماندا پچڕاوە، بەڵکو پەیوەندی بەردەوامە. جەختمان کردەوە کە پابەندین بە رێنماییەکانی شێخ و دڵنیاین کە فەرماندەی پۆلیس لە خەڵکی پارێزگاکە دەبێت و دەتوانین کاروبارەکانمان بە خۆمان بەڕێوەببەین.

 

 

بەها جەمال: رێگە نادەین نە سەرکردەی سەربازی و نە سەرکردەی کارگێڕیمان بەسەردا بسەپێنن، تەنانەت لە ئاستی پارێزگاریشدا. ئێمە لێرە لیژنەی جووڵانەوەمان بە پشتیوانی شێخ سەلمان حکمەت هاجری هەڵبژاردووە و پارێزگاریشمان هەڵبژاردووە، رەنگە ئەم بڕیارە لەگەڵ خواستەکانی ئەوان یەک نەگرێتەوە و مەحاڵە لەلایەن ئەوانەوە بەسەرماندا بسەپێنرێت.

 

 

بەها جەمال: رێککەوتن لەسەر کەسایەتییەک کرا بۆ وەرگرتنی پۆستێکی سەرکردایەتی وەک پارێزگار، بەڵام ئەم پێشنیارە لە لایەن لایەنەکانی شامەوە رەتکرایەوە و دەیانەوێت پارێزگارێک لە لای خۆیانەوە بسەپێنن. ئێمەش لە لایەن خۆمانەوە بە تەواوی رەتیدەکەینەوە کە پارێزگارێک لە لای ئەوانەوە بەسەرماندا بسەپێنرێت و جەخت دەکەینەوە کە بە هیچ شێوەیەک قبوڵی ناکەین پارێزگارێکی سەپێنراومان هەبێت.

 

 

بەها جەمال: ئێمە لە هەمان کاتدا چووینە شام، پێش لایەنەکانی دیکە نەکەوتین. بەڵێ، رۆڵمان هەبوو لە چوونە شام و بوونمان لەوێ بە هاوئاهەنگی لەگەڵ چەندین گرووپ و لایەنی جیاواز بوو، کە هەموو پێکهاتە و رەنگەکانی دەگرتەوە، نەک تەنیا خەڵکی تایفەی دورزی.

گەیشتنمان بۆ شام هاوکات بوو لەگەڵ دەستەی تەحریری شام، نزیکەی لە هەمان کاتدا، ئێمە دوو رۆژ پێشتر لەوێ بووین و رووبەڕووی پاشماوەی رژێم دەبووینەوە، کاتێکی زۆری پێچوو دەریانبکەین. لە کۆتاییدا، بوونێکی کەمتریان لە فڕۆکەخانەی خلخلە هەبوو، لەوێوە هێزەکانی شێخ کەرامە بە سەرکردایەتیی شێخ لەیس بەلعووس، لەگەڵ شێخی دامەزرێنەر فەهد وەحید بەلعووس جوڵان. لەگەڵ ئەم جوڵانەدا، پشتیوانی هێزەکانمان درێژ بووەوە بۆ شام، هاوکات لەگەڵ بوونی شۆڕشگێڕان و دەستە.