رووداو - تەندروستی
توێژینەوەیەکی زانکۆی مایەر لە نیویۆرک دەریدەخات، لەدایکبوونی پێشوەختە لە ئەمریکا بەرزبوونەوەی بەرچاوی بەخۆیەوە بینیوە و رێژەکە لەنێو خانمانی کەمدەرامەت زیاترە.
توێژینەوەکە ئاماژە بەوەدەکات، رێژەی لەدایکبوونی پێشوەختە بەراورد بە 15 ساڵی رابردوو 10٪ زیادیکردووە و هەر یەکە لە بەکارهێنانی تووتن لەلایەن خانمان، بەرزبوونەوەی ژمارەی خانمانی تووشبوو بە نەخۆشیی شەکرە و نەخۆشییە گوازراوەکان لە رێگەی سێکس هۆکاری بەرزبوونەوەی ئەم رێژەیەن.
دکتۆر لاورا پاولۆڤسکی، سەرپەرشتیاری توێژینەوەکە دەڵێت، ''پێویستە پزیشکانی پسپۆڕ کارێکی باشتر بکەن بۆ هۆشیارکردنەوەی خانمان لە هەڵبژاردنی شێوازی ژیانی تەندروست و کەمکردنەوە ئەگەرەکانی پێشوەختە لەدایکبوونی کۆرپەلە''.
بە گوێرەی مایۆکلینیک. ئەو منداڵانەی پێش هەفتەی 37ـی دووگیانی لەدایک دەبن، ئەگەری تووشبوونیان بە چەندین نەخۆشی، کێشەی هزری و گیانلەدەستدان زیاترە.
.png&w=3840&q=75)
