رووداو - تەندروستی
توێژینەوەیەک لە سوێد ئاشکرای دەکات، ئەوانەی وادەزانن ئەرک و کارەکانی ماڵەوە جێگرەوەی وەرزشن هەڵەن و کاریگەرییان لەسەر کەمکردنەوەی ئەگەری تووشبوون بە جەڵتە نییە.
توێژینەوەکە لە زانکۆی گۆتنبێرگ لە سوێد بە بەشداری سێ هەزار و 614 کرا و دەرکەوت، ئەو چالاکییانەی لە شوێنی کار یاخود ماڵەوە ئەنجامی دەدەین، بەس نین بۆ ئەوەی بمانپارێزن لە جەڵتە.
پسپۆڕانی توێژینەوەکە دەڵێن، جووڵە ئاساییەکانی رۆژانە جیاوازن لە وەرزش و چالاکییە جەستەییەکانی وەکو 'پایسکیلسواری، رۆیشتن بەپێ و وەرزشەکانی کاردیۆ' تاوەکو ئەگەری تووشبوون بە جەڵتە کەمبکەنەوە.
بە گوێرەی دامەزراوەی دڵ لە ئەمریکا، ئەمانەی خوارەوە نیشانەکانی جەڵتەی دڵن؛
- سینگئێشە
- ئازاری شان و قۆڵی چەپ
- هێڵنج و رشانەوە
- ئارەقکردن و ساردبوونی پێست
- هەناسەتەنگی
- ناڕێکیی لێدانی دڵ
هەر بەپێی دامەزراوەکە؛ ''خولەکێک دواکەوتن لە بووژانەوەی دڵ، 10٪ چانسی ژیان کەمدەبێتەوە''، هەر بۆیە ئەوانەی جەڵتە لێیان دەدات، پێویستە بە زووترین کات بگەیێندرێنە نەخۆشخانە.
