رووداو دیجیتاڵ
تەندروستیی سلێمانی دەڵێت، نەشتەرگەریی لابردنی چەوریی ورگ و نەشتەرگەریی تایبەت بە دابەزاندنی كێش لە هەموو نەخۆشخانە حكومی و ئەهلییەكان راگیرا.
ئەو بڕیارە بە فەرمانی د. سەباح هەورامی، بەڕێوەبەری تەندروستیی سلێمانییە. بڕیارەکە بۆ ماوەیەکی کاتییە "تاوەکو بە هەماهەنگی سەندیكای پزیشكانی كوردستان و كۆمەڵە پزشیكییەكان رێنمایی نوێی تایبەت بەو جۆرە نەشتەرگەرییانە دەردەكرێن".
تەندروستیی سلێمانی، نووسراوێکی بۆ نەخۆشخانەکان کردووە و ئاگاداری کردوونەتەوە لەوەی "هەموو جۆرەكانی نەشتەرگەریی تایبەت بە دابەزاندنی كێش و لابردنی چەوری بووەستێنن لەپێناو بەرژەوەندیی گشتی تاوەكو بە نووسراوێكی دیکە ئاگاداریان دەكەنەوە".
لە نووسراوەکەدا هاتووە، هەر کەس و لایەنێک سەرپێچیی بڕیارەکە بکات، "رێكاری یاسایی بەرامبەر سەرپێچیكار دەگیرێتەبەر".
ئەم بڕیارەی تەندروستیی سلێمانی دوای ئەوە هات، ژنێکی 36 ساڵان لە بەریتانیا گەڕایەوە هەرێمی کوردستان و لەدوای نەشتەرگەرییەکی جوانکاری، گیانی لەدەستدا.
ژنەکە ناوی (شۆخان عەبدوڵڵا) یە و، لە یەکێک لە نەخۆشخانە تایبەتەکانی سلێمانی نەشتەرگەریی جوانکاری بۆ کرا. کەسوکارەکەی دەڵێن، دوای ئەو نەشتەرگەرییە تەندروستیی تێکچووە و گیانی لەدەستداوە.
کەسێکی نزیکی شۆخان بە رووداوی راگەیاند، "هیچ کێشەیەکی نەبووە و ساخ و تەندروست بووە، لە نەخۆشخانەیەکی تایبەت لە سلێمانی نەشتەرگەریی راکێشانی چەوریی ورگی بۆ کرا، دوای ئەوە گیانی لەدەستدا."
نەشتەرگەرییەکی شۆخان عەبدوڵڵا شەوی سێشەممە کراوە.
.png&w=3840&q=75)
