دکتۆر سەیف بەدر، گوتەبێژی وەزارەتی تەندروستیی عێراق. وێنە: رووداو
رووداو - تەندروستی
گوتەبێژی تەندروستیی عێراق دەڵێت: ئێستا چەند بریندارێکی لوبنان لە نەخۆشخانەکانی شوێنە پیرۆزەکان و نەخۆشخانەکانی وەزارەتی تەندروستی هەن و بەو پەڕی تواناوە خزمەتیان دەکەن.
ئەمڕۆ یەکشەممە 13-10-2024 دکتۆر سەیف بەدر، گوتەبێژی وەزارەتی تەندروستیی عێراق بە رووداوی راگەیاند، ئەوانەی لە لوبنان و فەلەستینەوە هاتوونەتە عێراق میوانن {ئاوارە نین} و هەر شتێکیان پێویست بێت ئێمە ئامادەین هاوکارییان بکەین.
دکتۆر سەیف بەدر دەڵێت: ''بە بڕیاری سەرۆکوەزیرانی عێراق و وەزیری تەندروستیی عێراق، هەموو پێداویستی و کەلوپەلێکی تەندروستی و خزمەتگوزارییان پێشکێشدەکەین و تەنانەت تیمی تەندروستیش رەوانەی لوبنان دەکەین''.
لە بەشێکی قسەکانیدا گوتی، ''سوپاس بۆ خودا لە دابینکردنی پێداویستیی پزیشکی بۆیان، تووشی هیچ کێشەیەک نەبووین''.
سەیف بەدر ئەوەشی بە پەیامنێری رووداو گوت کە دڵنیایی تەواو دەدەن لە تۆمارنەکردنی تووشبووی ئاوڵەی مەیموون، هاوکات گوتیشی، ''هەموو پێداویستییەکی پشکنین بۆ نەخۆشییەکە ئامادەیە''.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ