رووداو - تەندروستی
توێژینەوەیەک لە ئوسترالیا دەریدەخات، ئەگەر خانمان لەماڵەوە ئیشەکانی شوێنی کارەکەیان بکەن و بە هەمەڕەنگی لەگەڵ ئیشەکانی ماڵەوەیان جێبەجێیان بکەن، ئاسوودەتر دەبن و گوشاری دەروونیشیان کەمتر دەبێتەوە. بەڵام بۆ پیاوان ئەمە جیاوازە.
توێژینەوەکە لەلایەن پەیمانگەی تەندروستیی نیشتمانیی ماڵبۆڕن لە ئوسترالیا کرا و و زانیارییەکانی 16 هەزار کارمەندی لە ئوسترالیا کۆکردووەتەوە، دەرکەوت؛ کارکردن لە ماڵەوە کاریگەریی ئەرێنیی زۆری هەیە لەسەر لایەنی دەروونیی خانمان، ئەمەش بەجۆرێک بوو کە بەشداربووان هەفتانە تەنیا دوو رۆژ لە ئۆفیس کاریان دەکرد و رۆژەکانی دیکە لە ماڵەوە کارەکانیان ئەنجام دەدا.
یان کاپاتیک، توێژەری پەیمانگەی میڵبۆڕن دەڵێت: ئەو ژنانەی دۆخی تەندروستییان خراپ بوو، کارکردن لە ماڵەوە باشتری کردن و ئارامتر بوونەوە، ئەمەش نەک لەبەر هاتووچۆکە، بەڵکو لەبەر ئەوەی ئاسانتر دەستیان بە کارەکانی ماڵەوە رادەگەیشت و توانیویانە کارە ئیدارییەکانیان و کارەکانی ماڵەوە بەیەکەوە بکەن.
لە توێژینەوەکەدا ئەوەش باس دەکرێت کە کارکردن لە ماڵەوە بۆ پیاوان هیچ کاریگەرییەکی لەسەر دەروونیان نەبووە.
.png&w=3840&q=75)
