هەڵەیەک روویدا! دووبارە هەوڵبدە
رووداو - تەندروستی
کۆمەڵەی پزیشکانی رادیۆلۆژیی کوردستان رایدەگەیێنێت، جگە لە پزیشکی پسپۆڕی تیشک و سۆنەر، هیچ پسپۆڕییەکی دیکە نابێت تیشک و سۆنەر بکات؛ سەرۆکی لقی سلێمانیی کۆمەڵەکەش دەڵێت: ''پێشێلکاری زۆر هەبووە''.
ئەمڕۆ سێشەممە 5-11-2024 د. سەعید نازم، سەرۆکی کۆمەڵەی پزیشکانی رادیۆلۆژیی کوردستان بە رووداوی راگەیاند، بڕیارەکە دەمێکە لەلایەن وەزارەتی تەندروستییەوە دراوە، بەڵام لەم دواییانە زیاتر پشکنینی تیشک و سۆنەر لەلایەن پسپۆڕی دیکەوە کراوە.
د. سەعدی نازم جەخت لەوە دەکاتەوە، ''هەر خولێک بە ناوی فێرکاری و راهێنان بۆ تیشک و سۆنەر بکرێتەوە و لەژێر سەرپەرشتیی وەزارەتی تەندروستی نەبێت، بڕوانامەکەی بەتاڵە و هیچ کەسێک بۆی نییە بەپێی ئەو خولانە تیشک و سۆنەر ئەنجامبدات''.
بە گوتەی سەرۆکی کۆمەڵەکە، ئەگەر تیشک و سۆنەر لەلایەن پسپۆڕی بوارەکە بکرێت، ئەوا کوالێتیی دەستنیشانکردنەکان و چۆنیەتیی ئەنجامدانی پڕۆسەکە بەرزدەبنەوە.
راگەیێندراوی کۆمەڵەکە لەلایەن لقی سلێمانییەوە بووە و د. عادل عوسمان، سەرۆکی لقی سلێمانیی کۆمەڵەکە دەڵێت: ''پێشێلکاری زۆر هەبووە کە لەلایەن پسپۆڕانی دیکەوە تیشک و سۆنەر کراوە''.
د. عادل عوسمان دەشڵێت: ''هەر کەسێک تیشک و سۆنەر بکات، دەبێت لەلایەن کۆمەڵەی رادیۆلۆژیستانی کوردستانەوە تۆمارکرابێت و مۆڵەتی وەزارەتی تەندروستیشی هەبێت''.
راگەیێندراوەکە لەلایەن لقی سلێمانیی کۆمەڵەکەوە بە شێوەیەکە کە دەڵێت، تێبینیکراوە لە هەندێک لە پزیشکانی بەشەکانی دیکەی جگە لە تیشک و سۆنەر، ئامێری سۆنەر لە کلینیکە تایبەت و حکومییەکان بەکاردەهێنرێت، ئەمەش پێشێلکردنی مافی پزیشکانی تیشک و سۆنەر و پێشێلکردنی مافی نەخۆشەکانیشە، چونکە هەڵە دەکەوێتە دەستنیشانکردنەکەوە و مافی نەخۆش و پسپۆڕانی بوارەکەش پێشێلدەکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ