رووداو دیجیتاڵ
بەشیر ناسری، پەیکەرسازی کورد، پەیکەرێک بۆ دڵشاد سەعید، ژەنیار و ئاوازدانەری ناسراوی کورد دروستدەکات و دەڵێت، دەیەوێت لە داهاتوودا پەیکەر بۆ موجتەبا میرزادەش دروستبکات.
بەشیر ناسری لەبارەی کارە نوێیەکەیەوە بە رووداوی راگەیاند: "پەیکەرەکەی دڵشاد سەعیدم بە حەزی تایبەتی خۆم دروستکردووە و لەسەر داوای هیچ کەس و لایەنێک نەبووە، بەڵام ئەگەر دواتر لایەنێک داوای بکات، پێیان دەدەم".
سەبارەت بە هۆکاری هەڵبژاردنی دڵشاد سەعید وەک بۆ ئەوەی پەیکەرێکی بۆ دروست بکات، گوتی: "دڵشاد سەعید یەکێکە لەو کەسایەتییە گرنگانەی خزمەتێکی گەورەی بە میوزیکی کوردی کردووە؛ ئەو ژەنیارێکی لێهاتووی ڤایۆلین و کەسێکی ئەکادیمییە، کاریگەرییەکی زۆری لەسەر هونەرمەندانی سەردەمی خۆی و ئێستاش هەبووە".
پەیکەرەکە لە کەرەستەی فایبەر گڵاس دروستکراوە، بەرزییەکەی مەتر و نیوێکە و کارکردن تێیدا سێ مانگی خایاندووە. ئاماژەی بەوەش کرد، پڕۆژەی داهاتووی دروستکردنی پەیکەرێک دەبێت بۆ موجتەبا میرزادە، هونەرمەندی کۆچکردوو.
بەشیر ناسری خەڵکی پاوەی رۆژهەڵاتی کوردستانە، دەرچووی بەشی هونەرە جوانەکانی زانکۆی تارانە. پێشتر پەیکەری بۆ چەندین کەسایەتیی ناسراوی وەک مەزهەر خالقی، شێرکۆ بێکەس، هەژار موکریانی، پیرەمێرد، مەولەوی، بێسارانی، شەهرام نازری، محەممەد رەزا شەجەریان، میرزا شەفیعی پاوەیی و خاڵۆ حسێنی کێوکەنی دروستکردووە.
پەیکەرەکانی مەولەوی، بێسارانی و میرزا شەفیعی پاوەیی کە کارەکانی ناسرین، لە مەیدانە گشتییەکانی شاری پاوە جێگیر کراون.
.jpg "پەیکەری دڵشاد سەعید")
.jpg "پەیکەری دڵشاد سەعید")
