رووداو- سلێمانی
گۆرانیبێژی شاری سلێمانی ئەحمەد خەلیل دەڵێت بە هەزاران كچ پەیوەندیی پێوەدەكەن بۆ خۆشەویستی و هاوسەرگیری، بەڵام بڕیاری داوە جارێكی دیكە نە خۆشەویستی بکات و نە هاوسەرگیری بكاتەوە. دانیش بەوەدا دەنێت كە تا دەمرێت عاشقە.
ئەحمەد خەلیل ساڵی 1984 لە گەڕەكی كانێسكانی شاری سلێمانی لەدایك بووە، بەڵام تەمەنی منداڵی و گەورەبوونی لە گەڕەكی سەرچنار بەسەربردووە. ساڵی 2012 دەستی بە گۆرانیگوتن بە شێوەی تراک كردووە و ئێستا یەکێکە لە گۆرانیبێژە خاوەن جەماوەرەکانی سلێمانی. ئەحمەد لەم هەڤپەیڤینەدا لەگەڵ (رووداو) ئاشکرای دەکات کە بەنیازە ئەم مانگە یەكەم ئەلبوومی خۆی بڵاوبكاتەوە.
رووداو: لە گەڕەكی كانێسكان لەدایك بوویت و لە سەرچنار گەورە بوویت. دەڵێن منداڵانی كانێسكان و سەرچنار جیاواز بوون، ئەوەی یەكەمیان زۆر بزێون و دووەمیان فەقیرن، تۆ کامیان بوویت؟
ئەحمەد خەلیل: (بەپێكەنینەوە) بە منداڵی زۆر هار بووم. كاتێك چووینەتە ماڵان، دایكم دەیگوت: ئەحمەد نەڕۆیتە سەر دارەكانیان.
رووداو: تا پۆلی چەندت خوێندووە؟
ئەحمەد خەلیل: بەهۆی خراپیی باری ئابووریمانەوە تا قۆناغی یەكی ناوەندیم خوێند.
رووداو: زۆرتر چ ئیشێکت کردووە؟
ئەحمەد خەلیل: هەموو ئیشێكم كردووە، هەر لە بۆیاخچیی پێڵاوەوە تاوەکو حەمباڵی. دەتوانم ساتە خۆشەكانی ژیانم ببژێرم، بەڵام بۆ ناخۆشەكان ئەوەندەن زۆرن بیرم نایەنەوە. لەگەڵ ئەوەشدا هەر رازیم بە ژیانم.
رووداو: چۆن دەستت بە كاری هونەری كرد؟
ئەحمەد خەلیل: بۆخۆم بەهرەیەكم هەبوو. لەساڵی 2000یشەوە بەردەوام گوێم لە گۆرانی گرتووە. ساڵی 2012 یەكەمین بەرهەمم بە ناوی (چاوەڕوانی) تۆماركرد. لە تێكستی رەزای ئەكبەری و موزیسیان ئەفشین شوكری. لەسەر داوای ئەوان گۆرانییەکەم گوت و كارێكی زۆر باش بوو. ئەمساڵیش گۆرانیی (وەفا)م بڵاوكردەوە.
رووداو: دەڵێن گۆرانی چاوەڕوانی لای خۆت زۆر تایبەتە؟
ئەحمەد خەلیل: راستە، لەبەرئەوەی بۆ خۆشەویستیی پێشتر گوتوومە. جگە لەوەش دوو جار كلیپەكەم بەدڵ نەبوو و دووبارەم كردەوە، تا سێیەمم بەدڵ بوو.
رووداو: لە گۆرانی گوتندا زیاتر كاریگەریی كێت بەسەرەوە بوو؟
ئەحمەد خەلیل: هونەرمەندانی خۆشەویست ناسر رەزازی، پەیوەند جاف، حەمەجەزا و ئەردەلان بەكر.
رووداو: بۆچی گۆرانییەكانت خاون؟
ئەحمەد خەلیل: دەتوانم بە زۆربەی ستایلەكان گۆرانی بڵێم، بەڵام خۆم لە ئەرەبێسكدا بە سەرکەوتووتر دەزانم.
رووداو: دەڵێن بەشداریی شەوئاهەنگەكانیش دەكەیت؟
ئەحمەد خەلیل: راستە، لە 2013ەوە بەشداری دەكەم. جاری وا هەیە هەموو شەوێكی هەفتە لە شەوئاهەنگم، ئەوەش بۆ لایەنی دارایی و خەرجی كارە هونەرییەكانم باشە.
رووداو: زۆرجار ئەو گۆرانیبێژانەی بەشداری شەوئاهەنگەكان دەكەن، وا لێیان دەڕوانرێت كە لە كەسایەتییان دادەبەزێت، لەو بارەیەوە رات چییە؟
ئەحمەد خەلیل: رەنگە هەندێك كەس بەوشێوەیە لێی بڕوانن، بەڵام ئەوە راست نییە.
نایشارمەوە بژێویی ژیانمی لەسەرە. پاشان چ كاتێك هەناسەم پێنەما، ئەوكات واز لە گۆرانیگوتن و شەوئاهەنگ دەهێنم، لەبەرئەوەی حەزم لە گۆرانی و شەوئاهەنگە.
رووداو: ئەلبوومە نوێیەكەت بەڕێوەیە، چیی تێدادەبێت؟
ئەحمەد خەلیل: ئەلبوومەكە ناوی (نەبەرد)ە. ئەوەش لە خۆشەویستیی هاوڕێیەكمە، کە بەداخەوە بە رووداوێك گیانی لەدەستدا. ئەلبوومەكە 10 گۆرانییە و لەسەر ستایلی ئەرەبێسكە. لە توركیاش كاری میوزیكم بۆ كردووە. سێ ساڵە كاری بۆ دەكەم و لە كۆتایی ئەم مانگەدا بڵاودەكرێتەوە. بۆ تێكستەكان هاوڕێم بەڵێن سەنگاوی هاوكاریی كردووم، لەگەڵ هۆنراوەی خۆم و ئاوازەكانیش وەرگیراون. بەنیازم چەند كلیپێكیش بكەم. دەمەوێ ئەوەش بڵێم کە ئەلبوومەكە بە دیاری دەبەخشمە سەنتەری ئارۆ بۆئەوەی بڵاوی بكەنەوە.
رووداو: بۆچی دەیکەیتە دیاری؟
ئەحمەد خەلیل: لەبەرئەوەی لەكاتی بڵاوكردنەوەی یەكەم گۆرانیمدا بە باشی پێشوازییان لێكردم. منیش لە وەفای ئەو پێشوازییەدا پێشكەشیان دەكەمەوە.
رووداو: ئەلبوومەكە چەندی تێچووە؟
ئەحمەد خەلیل: نزیكەی بیست هەزار دۆلار، بەڵام سپۆنسەری هەیە.
رووداو: هاوسەرگیریت کردووە؟
ئەحمەد خەلیل: بەڵێ، بەڵام وەكو زۆربەی خەڵكی دیكە جیابووینەوە.
رووداو: بەنیاز نیت جارێكی دیكە خێزان دروست بکەیتەوە؟
ئەحمەد خەلیل: لە هەموو تەمەنمدا دووجار خۆشەویستیم كردووە. یەكێكیان چووینە ژیانی هاوسەرگیری و ئەوەی دیكەش لە خۆشەویستیدا كۆتایی هات، بەڵام جارێكی دیكە نایكەمەوە بە سێ خۆشەویستی و بەنیازیش نیم ژن بهێنمەوە.
رووداو: کوڕان زۆرتر گوێگری گۆرانییەکانتن یان کچان؟
ئەحمەد خەلیل: لای من هیچ جیاوازییەكیان نییە.
رووداو: كچ هەیە لە فەیسبووكەوە داوای خۆشەویستیت لێبكات؟
ئەحمەد خەلیل: بە هەزاران هەن، تەنانەت داوای هاوسەرگیریش دەكەن، بەڵام خۆم بە كەسێكی زۆر سادە دەبینم. خۆشەویستیش بۆ من نابێت.
رووداو: بۆچی؟
ئەحمەد خەلیل: لەبەرئەوەی دوو جار تێیدا سەركەوتوو نەبووم و نایكەمەوە بە سێ. هەموو خۆشەویستیم بە هونەرەكەم داوە، بەڵام تا دەمرم عاشقم.
رووداو: عاشقی کێیت؟
ئەحمەد خەلیل: ناتوانم وردەكاری باس بكەم.
رووداو: پێتخۆشە گۆرانی بۆ كێ بڵێیت؟
ئەحمەد خەلیل: بۆ باوك یان دایك.
رووداو: رقت لە كێیە؟
ئەحمەد خەلیل: لەو كەسەی بەردەوام قسەیەك دووبارە بكاتەوە، یاخود شتێك بزانم وایە و ئەو كەسە بڵێت وانییە، بەڵام زۆر زووش دڵم چاك دەبێتەوە.
رووداو: پێتخۆشە لەگەڵ كێ دوێت بكەیت؟
ئەحمەد خەلیل: بڕیارە لەگەڵ هونەرمەندی خۆشەویست پەیوەند جاف گۆرانییەك بڵێین.
رووداو: ئەی لەگەڵ گۆرانیبێژە کچەکان؟
ئەحمەد خەلیل: سەرسامم بە دەنگی لەیلا فەریقی. پێمخۆشە دوێتی لەگەڵ بكەم.
رووداو: لە كلیپدا دەرناكەویت؟
ئەحمەد خەلیل: لە نواندن نازانم، بەڵام لە كلیپدا جووڵەم زۆرە و زۆرجار دەرهێنەریش لێم بێزار دەبێت.
رووداو: دەڵێن زۆر سەرسامی بە دەنگی خۆت. ئەمە راستە؟
ئەحمەد خەلیل: لە هەموو تەمەنمدا بەتەنیا گوێم لە خۆم نەگرتووە، بەڵام كاتێك لەگەڵ هاوڕێیەكم رێككەوتبێت گوێم لە خۆم گرتووە.
رووداو: ئەی بۆچی زەنگی مۆبایلەكانت گۆرانیی خۆتن؟
ئەحمەد خەلیل: ئاسیاسێڵ و كۆڕەك خۆیان دایانناون، نەك خۆم داینێم، بەڵام كە داشینێن، ناڵێم دایمەنێن.
