رووداو دیجیتاڵ
حکومەتی بەریتانیا، کاردانەوەی بەرامبەر بڕیارەکەی دادگەی نێودەوڵەتیی داد نیشاندا کە رایگەیاندبوو، "میانمار تاوانی کۆمەڵکوژیی دژی رۆهینگیا کردووە" و دەڵێت، پاشکۆی سەربازیی ئەو وڵاتە لە لەندەن دەردەکات و داوای کۆبوونەوەی بەپەلەی ئەنجوومەنی ئاسایش دەکات.
رۆژی پێنجشەممە، 19ـی تشرینی دووەمی 2026، دادگەی نێودەوڵەتیی داد بڕیارێکی دەرکرد و رایگەیاند، میانمار تاوانی کۆمەڵکوژیی دژی رۆهینگیا ئەنجامداوە.
لە راگەیێندراوێکدا، ئێد میلیباند، وەزیری دەرەوەی بەریتانیا رایگەیاند، وڵاتەکەی جارێکی دیکە پشتگیریی تەواوی خۆی بۆ دادگە و سیستمی دادی نێودەوڵەتی دووپاتدەکاتەوە و سەرکۆنەی ئەو "مامەڵە دڕندانەیە" دەکات کە گەلی رۆهینگیا لەسەر دەستی رژێمی سەربازیی میانمار رووبەڕووی بووەتەوە.
وەزیری دەرەوەی بەریتانیا، ئاماژەی بەوەشکرد، لەندەن سوورە لەسەر کارکردن بۆ دڵنیابوون لە لێپرسینەوە لە ئەنجامدەرانی ئەو تاوانانە و گوتی: "فەرمانمان کردووە بە دەرکردنی پاشکۆی سەربازی لە باڵیۆزخانەی میانمار لە بەریتانیا، هەروەها داوای کۆبوونەوەیەکی بەپەلەی ئەنجوومەنی ئاسایش دەکەین بۆ تاوتوێکردنی ئەم بڕیارە."
ئێد میلیباند دەڵێ،"پێویستە بڕیارەکەی دادگە پەیامێکی روون بنێرێت کە ناکرێت ئەم تاوانانە بکرێن و لە سزا دەرباز بن."
راگەیێندراوەکەی وەزارەتی دەرەوەی بەریتانیا، باس لەوە دەکات، گەلی رۆهینگیا ساڵانێکە بەدەست تووندوتیژی، ئاوارەبوون و سەرکوتکردنەوە دەناڵێنێت و پێویستە کۆمەڵگەی نێودەوڵەتی رۆڵی خۆی لە جێبەجێکردنی بڕیارەکە، لێپرسینەوە و بەدیهێنانی دادپەروەری بۆ رۆهینگیا ببینێت.
هەروەها، وەزارەتی دەرەوەی بەریتانیا رایگەیاند، کارگوزاری باڵیۆزخانەی میانمار بانگهێشت دەکەن و لە رۆژانی داهاتوودا رێکاری زیاتر بۆ لێپرسینەوە لە بەرپرسانی ئەو تاوانانە دیاری دەکەن.



