رووداو دیجیتاڵ
حەکیم جێفریس، سەرکردەی دیموکراتەکان لە ئەنجوومەنی نوێنەرانی ئەمریکا، رۆژی چوارشەممە هەنگاوێکی مێژوویی دەنێت بۆ ئەوەی ببێتە یەکەمین سەرۆکی رەشپێست لە مێژووی ئەنجوومەنی نوێنەرانی ئەمریکادا.
ئەم یاسادانەرە تەمەن 56 ساڵانەی خەڵکی نیویۆرک، لە دەنگدانی داخراوی نێوخۆی پارتەکەیدا هیچ رکابەرێکی راگەیێندراوی لە بەرامبەردا نییە، ئەمەش رێگەی بۆ خۆش دەکات تاوەکو سەرکردایەتیی زۆرینەیەکی بەهێزی دیموکراتەکان لە ئەنجوومەنی نوێنەران لە ماوەی دوو ساڵی کۆتایی خولی سەرۆکایەتیی دۆناڵد ترەمپدا بگرێتە دەست؛ بەڵام ئەم دەستکەوتە مێژووییە لەگەڵ هۆشداریی باڵی چەپڕەوی بەهێزبووی پارتەکەیدا دێت بەوەی کە بردنەوەی هەڵبژاردن شتێکە و رێککەوتن لەسەر چۆنیەتی بەکارهێنانی دەسەڵات شتێکی تەواو جیاوازە.
دەنگدانی رۆژی چوارشەممە و کێبڕکێی کۆنگرێس
دەنگدانی رۆژی چوارشەممە جێفریس، کە لە ئێستادا سەرۆکایەتیی کەمینەی دیموکراتەکان لە ئەنجوومەنی نوێنەران دەکات، وەک بەربژێری فەرمیی پارتەکە بۆ پۆستی سەرۆکی ئەنجوومەن دەستنیشان دەکات؛ دواتریش پێویستە لە 3ی کانوونی دووەمی ساڵی داهاتوودا، لە کاتی دەستبەکاربوونی کۆنگرێسی نوێ، لە دەنگدانی گشتیی تەواوی ئەندامانی ئەنجوومەنی نوێنەراندا سەرکەوتن بەدەستبهێنێت.
هاوپەیمانەکانی جێفریس هیواخوازن بە چەپڵەلێدان و بەبێ دەنگدان هەڵبژێردرێت، وەک ئەوەی لە ساڵی 2007دا بۆ نانسی پیلۆسی کرا بەرلەوەی ببێتە یەکەمین ژن لە پۆستی سەرۆکی ئەنجوومەنی نوێنەراندا؛ بەڵام ژمارەیەک لە پەرلەمانتارە چەپڕەوە تازەهەڵبژێردراوەکان پشتگیریی خۆیان راگرتووە و داوای سازش و مەرج دەکەن لەسەر چەندین پرسی هەستیار، لەوانە سنووردارکردنی پشتیوانیی ئەمریکا بۆ ئیسرائیل و نەهێشتنی هەژموونی پارە و سەرمایە لە سیاسەتی ئەمریکادا.
سەرەڕای ئەوەش، پێشبینی ناکرێت ئەم ناڕەزایەتییە رێگری لە سەرکەوتنی جێفریس بکات، کە بەهۆی دۆڕانی کۆمارییەکانەوە، کە دەخرێتە ئەستۆی جەنگی ئێران و بەرزبوونەوەی نرخی سووتەمەنی، خاوەنی زۆرینەیەکی گەورەیە.
جێفریس لە کۆنگرەیەکی رۆژنامەڤانیدا گوتی: "ئێمە شەڕ دەکەین بۆ ئەوەی بژێوی لەم وڵاتەدا گونجاو بێت، تێچووی بەرزی ژیان دابەزێنین، و لە هەمان کاتدا دڵنیاببینەوە لەوەی ئەو گەندەڵکارانە رووبەڕووی لێپرسینەوە دەکەینەوە کە گەندەڵیی بێوێنەیان بەسەر گەلی ئەمریکادا هێناوە."
رەگ و ریشەی لە برۆکلین و سەنگەری دژی ترەمپ
جێفریس لە گەڕەکی کراون هایتس لە برۆکلین گەورە بووە، وەک پارێزەر خوێندوویەتی بەرلەوەی لە ساڵی 2007دا بچێتە پەرلەمانی ویلایەتی نیویۆرک و لە ساڵی 2013شدا ببێتە ئەندامی کۆنگرێسی ئەمریکا. وتاربێژێکی بەسەلیقەیە و بە لەسەرخۆیی و حەزی بۆ ئاماژەدان بە مۆسیقای هیپ هۆپ ناسراوە؛ لە ساڵی 2022دا وەک یەکەمین یاسادانەری رەشپێست لە مێژوودا سەرۆکایەتیی پارتێکی لە کۆنگرێسدا وەرگرت کاتێک شوێنی نانسی پیلۆسی گرتەوە.
جێفریس هەروەها لە ساڵی 2020دا وەک یەکێک لە داواکارانی گشتیی ئەنجوومەنی نوێنەران لە پرۆسەی دادگاییکردنی ترەمپ لە ئەنجوومەنی پیراندا کاری کردبوو. بەدەستهێنانی ئەم پۆستە بایەخێکی گەورەی هەیە، چونکە سەرۆکی ئەنجوومەنی نوێنەران سەرۆکایەتیی یەکێک لە بەهێزترین دامەزراوەکانی واشنتن دەکات و دووەم کەسە لە هێڵی دەسەڵاتدا بۆ وەرگرتنی پۆستی سەرۆکایەتیی ئەمریکا لە دوای جێگری سەرۆک.
لە رووی کرداریشەوە، جێفریس رووبەڕووی ئاستەنگی گەورە دەبێتەوە بۆ یەکخستنی فراکسیۆنەکەی لە نێوان میانڕەوەکان و باڵی چەپدا، هاوکات لەگەڵ ئاڕاستەکردنی یاساکان بەرەو سەرۆکێکی کۆماری کە مافی ڤیتۆی هەیە. دیموکراتەکان بەڵێنیانداوە لێکۆڵینەوە لە ئیدارەی ترەمپ دەستپێبکەن، لە کاتێکدا هێشتا ناکۆکی لەسەر دۆسیەی جەنگی ئێران، سیاسەتی تەندروستی و چۆنیەتی جێبەجێکردنی کارنامەکەیان لە نێوانیاندا ماوەتەوە.
ململانێی سەخت لە ئەنجوومەنی پیران و هەڵبژاردنی سەرکردەی کۆمارییەکان
لە کاتێکدا دۆخی ئەنجوومەنی نوێنەران بۆ دیموکراتەکان هێمنە، لە ئەنجوومەنی پیراندا ململانێیەکی توند بۆ سەرکردایەتیی پارتەکە درووستبووە؛ چەک شومەر، سەرکردەی دێرینی دیموکراتەکان لەلایەن سیناتۆری چەپڕەو کریس ڤان هۆڵن لە ویلایەتی مێریلاند کێبڕکێی دەکرێت، کە پشتیوانیی کەسایەتییە دیارەکانی وەک بێرنی ساندەرزی بەدەستهێناوە. بڕیارە دیموکراتەکانی ئەنجوومەنی پیران لە سەرەتای مانگی کانوونی یەکەمدا سەرکردەی خۆیان هەڵبژێرن.
لە بەرامبەردا، کۆمارییەکان هەفتەی رابردوو سەرکردەکانی خۆیان دیاریکرد؛ لە ئەنجوومەنی نوێنەران جیم جۆردانی هاوپەیمانی سەرەکیی ترەمپیان هەڵبژارد، لە کاتێکدا لە ئەنجوومەنی پیراندا جۆن سوونیان لە پۆستی سەرۆکی کۆنفرانسی کۆمارییەکاندا هێشتەوە.
