رووداو دیجیتاڵ
چاوەکان لەسەر ئیسحاق هێرزۆگ، سەرۆکی ئیسرائیلن کاتێک بڕیار دەدات ئەرکی پێکهێنانی حکومەتی هاوپەیمانیی داهاتوو بە کێ بسپێرێ. ئەم بڕیارە زۆر چارەنووسسازە، چونکە نە بەرەی بنیامین نەتەنیاهوو، سەرۆکوەزیران و نە بەرەی گادی ئایزێنکۆتی رکابەری، نەیانتوانیوە زۆرینەی کورسییەکانی پەرلەمان بەدەستبێنن.
هێرزۆگ ئەمڕۆ چوارشەممە راوێژ و دانوستاندنەکانی لەگەڵ نوێنەرانی پارتە سیاسییەکان دەستپێدەکات، تاوەکو بڕیار لەسەر ئەو بەربژێرە بدات کە زۆرترین دەرفەتی پێکهێنانی حکومەتی هەیە — کە مەرج نییە سەرۆکی ئەو پارتە بێت زۆرترین کورسیی بەدەستهێناوە.
هێرزۆگ داوای کردووە هەموو هەوڵێک بدرێت بۆ ئەوەی رێگری لە ئەنجامدانی هەڵبژاردنێکی نوێ بکرێت و کەمێک دوای هەڵبژاردنەکانیش گوتی: "چاوەڕوانم هەموو ئەوانەی دێنە ئێرە، بە بیرکردنەوەیەکی کراوەوە بێن."
رەتکردنەوەی گوشارەکانی دەرەوە
پێش دەنگدانی 27ی تشرینی یەکەم، هێرزۆگ دانی بەوەدانا کە گوشارێکی یەکجار زۆر دەبێت، بەڵام بەڵێنی دا رێگە نەدات کاریگەریی دەرەکی، بەتایبەتی لە لایەن دۆناڵد ترەمپ، سەرۆکی ئەمریکاوە، بڕیارەکەی بگۆڕێ.
هێرزۆگ بە میدیای ئەمریکی راگەیاند: "پێموانییە سەرۆکی ویلایەتە یەکگرتووەکانی ئەمریکا یان هەر کەسێکی دیکە بتوانێت دەستوەردان لە بڕیاری مندا بکات؛ ئەمە دیموکراسی و دەستووری ئیسرائیلە و تەنیا ئەوەش بۆ من گرنگە."
هێرزۆگ ئاماژەی بەوەش کرد کە هەموو توانای خۆی بەکاردەهێنێت بۆ دوورکەوتنەوە لە هەڵبژاردنی نوێ، لەوانەش پشتگیریکردن لە پێکهێنانی حکومەتێکی یەکێتیی نیشتمانی لە نێوان نەتەنیاهوو و ئایزێنکۆتدا.
سەرۆکی ئیسرائیل رووبەڕووی گوشاری ترەمپ بووەتەوە بۆ لێخۆشبوون لە نەتەنیاهوو لە دادگاییکردنە درێژخایەنەکانی گەندەڵیدا، کە دەکرێ لە ئەگەری لەدەستدانی دەسەڵاتدا زیندانی بکرێت. لە مانگی نیساندا، هێرزۆگ پارێزەرانی نەتەنیاهوو و داواکارانی گشتیی بانگهێشتی شوێنی مانەوەی خۆی کرد بۆ دانوستاندن لەسەر ئەو پرسە.
پاشخانی سیاسی و خێزانیی هێرزۆگ
هێرزۆگ کە تەمەنی 66 ساڵە، لە ساڵی 2021دا دوای بردنەوەیەکی گەورە لەنێو پەرلەمانتاراندا سوێندی یاسایی خوارد. یائیر لاپید، کە ئێستا ئەندامی بەرەی ئۆپۆزیسیۆنی ئایزێنکۆتە، لەو کاتەدا ستایشی هێرزۆگی کرد و گوتی: "پیاوێکی شایستە و نایابە کە هەمیشە سەرنجی لەسەر چاکەی وڵات و گەلی جووە."
پێش ئەوەی ببێتە سەرۆک، هێرزۆگ لە ساڵی 2003 بۆ پەرلەمانی ئیسرائیل هەڵبژێردرا و پۆستی وەزارەتەکانی نیشتەجێکردن، گەشتوگوزار و چاودێریی کۆمەڵایەتیی بەڕێوەبردووە؛ لە ساڵی 2015ش وەک رێبەری پارتی کاری چەپی ناوەڕاست، رکابەریی نەتەنیاهووی کرد بۆ وەرگرتنی پۆستی سەرۆکوەزیران.
نەتەنیاهوو کە ئێستا تەمەنی 77 ساڵە، درێژترین ماوەی سەرۆکوەزیرانی لە مێژووی ئیسرائیلدا تۆمار کردووە و نزیکەی دوو دەیە حوکمڕانی کردووە. ئەم هەڵبژاردنەش وەک راپرسییەک لەسەر دەسەڵاتەکەی سەیر دەکرا، دوای ئەوەی وڵاتەکەی بەرەو راستڕۆی تووند برد و دوای هێرشەکەی 7ی تشرینی یەکەمی 2023ی حەماس، شەپۆلێک جەنگی لە ناوچەکەدا هەڵگیرساند.
گۆڕانکاری لە ناوچەکە و دانوستاندن لەگەڵ لوبنان
هێرزۆگ لە ئاداری رابردوودا بە ئاژانسی فرانس پرێسی راگەیاند، جەنگی ئەمریکا و ئیسرائیل لەگەڵ ئێران "وەرچەرخانێکی مێژووییە" و گوتی: "کاتێک دێت کە دوای زیاتر لە نەوەیەک لە جەنگی بێ کۆتایی، خوێنڕشتن و تیرۆر، سەرچاوە سەرەکییەکەی کە لە تارانەوە دێ، رادەگیرێ و تەواوی ئاراستەی ناوچەکە دەگۆڕدرێ."
هێرزۆگ جەختی لە گرنگیی گفتوگۆ لەگەڵ لوبنان کردەوە، کە مانگی دواتر هەردوولا بۆ دانوستاندنی راستەوخۆ کۆبوونەوە و تاوەکو ئێستاش بەردەوامە.
حاییم هێرزۆگ، باوکی ئیسحاق هێرزۆگ کە لەدایکبووی ئێرلەندایە، پێشتر سەرۆکی هەواڵگریی سەربازیی ئیسرائیل بووە، پاشان بووەتە باڵیۆزی وڵاتەکە لە نەتەوە یەکگرتووەکان و شەشەمین سەرۆکی ئیسرائیل بووە لەنێوان ساڵانی 1983 تاوەکو 1993.
هەروەها باپیرەی، خاخام یتزحاک هالێڤی هێرزۆگ، یەکەمین سەرۆک خاخامی ئەشکەنازییەکان بووە لە ئیسرائیل.
