رووداو دیجیتاڵ
باڵیۆزخانەی ئەمریکا لە مۆسکۆ هۆشدارییەکی بەپەلەی ئەمنیی دایە بەرپرسانی رووسیا لەبارەی پلانی "پەلامارێکی تیرۆریستی" لە پایتەختی ئەو وڵاتە کە ئەگەری هەیە قوربانییەکی زۆری لێبکەوێتەوە. دەزگەی ئاسایشی فیدراڵیی رووسیاش (FSB) پشتڕاستی کردەوە، زانیارییەکانی لە ئەمریکاوە پێگەیشتووە و رێکاری پێویستی گرتووەتەبەر.
رۆژی شەممە 31-10-2026، باڵیۆزخانەی ئەمریکا لە رووسیا لە راگەیێندراوێکی ئەمنیدا هۆشداری دا، "ئەمریکا زانیاریی باوەڕپێکراوی لەبەردەستدایە لەسەر هەڕەشەی رووداوێک کە لەوانەیە ببێتە هۆی کەوتنەوەی قوربانییەکی زۆر لە مۆزەخانە و پارکی تساریتسینۆ لە مۆسکۆ."
باڵیۆزخانەکە داوای لە هاووڵاتییانی کرد بە تەواوی لەو ناوچەیە دووربکەونەوە و رایگەیاند، حکومەتی ئەمریکا لەگەڵ لایەنە پەیوەندیدارەکانی رووسیا لە هاوئاهەنگیدایە بۆ وەڵامدانەوەی ئەم هەڕەشەیە.
دوای هۆشدارییەکە، دەزگەی ئاسایشی فیدراڵیی رووسیا (FSB) بە میدیای فەرمیی وڵاتەکەی راگەیاند: "زانیاریمان لە هاوبەشە ئەمریکییەکانەوە پێگەیشتووە لەبارەی پلانی هێرشێکی تیرۆریستی لە مۆسکۆ و رێوشوێنی گونجاومان گرتووەتەبەر."
ئەم ئاگادارکردنەوەیە لە کاتێکدایە، لە 22ـی ئاداری ساڵی 2024ـیشدا، واشنتن بەرپرسانی مۆسکۆی لە ئەگەری "پەلامارێکی تیرۆریستی" ئاگادارکردەوە پێش ئەوەی هێرشەکەی هۆڵی (کرۆکۆس سیتی هۆڵ) لە مۆسکۆ رووبدات، کە بووە هۆی کوژرانی 145 کەس و برینداربوونی سەدانی دیکە، بەڵام لەو کاتەدا بەرپرسانی هەواڵگریی رووسیا زانیارییەکانی ئەمریکایان بە "زۆر گشتی" وەسف کردبوو.
