رووداو دیجیتاڵ
بەپێی ئەو راپرسییەی لە دوای دەنگدان لەنێوان دەنگدەران لە بەردەم بنکەکانی دەنگداندا کراوە، پارتی چەپی ئەڵمانیا (دی لینکە) لە هەڵبژاردنی ویلایەتی بەرلیندا سەرکەوتنی بەسەر پارتی کرستیان دیموکرات(CDU)ـی سەر بە فرێدریش مێرتس، راوێژکاری ئەڵمانیادا بەدەستهێنا. زنار شینۆ، پەیامنێری تۆڕی میدیایی رووداو لە ئەڵمانیا باس لەوە دەکات، چاوەڕوان دەکرێت سێ بۆ پنج بەربژێری کورد بگەنە پەرلەمانی هەرێمی بەرلین.
بەپێی راپرسییەکانی کەناڵە گشتییەکانی ئەڵمانیا ARD و ZDF، پارتی دی لینکە بە سەرۆکایەتیی ئەلیف ئێرالپ توانیویەتی لەنێوان 24.5% بۆ 26%ـی دەنگەکان مسۆگەر بکات، لە بەرامبەردا پارتی کریستیان دیموکرات (CDU) نزیکەی 20%ـی دەنگەکانی بەدەستهێناوە، کە ئێستا سەرۆکایەتیی حکومەتی هاوپەیمانی لە بەرلینی پایتەخت دەکات.
هاوکات پارتی راستڕۆی تووندڕۆی ئەڵتەرناتیڤ بۆ ئەڵمانیا (AfD) پێشڕەویی بەرچاوی لە هەردوو هەڵبژاردنی ویلایەتەکانی بەرلین و مێکلنبێرگ فۆرپۆمەرندا بەدەستهێناوە.
راپرسییەکان دەریانخستووە کە پارتی AfD لە ویلایەتی مێکلنبێرگ فۆرپۆمەرن لە باکووری رۆژهەڵاتی ئەڵمانیا بە بەدەستهێنانی 37% بۆ 38%ـی دەنگەکان پلەی یەکەمی گرتووە، هەروەها لە بەرلینیش توانیویەتی 16%ـی دەنگەکان بەدەستبهێنێت؛ هەرچەندە بەهۆی سیاسەتی "دیواری ئاگرین" و رێککەوتنی پارتە سەرەکییەکان لەسەر هاوکاری نەکردن لەگەڵ راستڕۆوە تووندڕۆوەکاندا، چاوەڕوان دەکرێت رێگری لە چوونەنێو دەسەڵاتی ئەو پارتە بکرێت لە هەردوو ویلایەتەکەدا.
فرێدریش مێرز، راوێژکاری ئەڵمانیا ئەنجامی هەڵبژاردنەکەی لە ویلایەتی مێکلنبێرگ فۆرپۆمەرن بە "کارەسات" بۆ پارتەکەی (CDU) ناو برد، بەڵام بەڵێنیدا سەرەڕای ئەم پاشەکشەیەی لە هەڵبژاردنەکاندا رووبەڕووی بوونەتەوە، بەردەوام دەبێت لەسەر پرۆسەی چاکسازییەکانی حکومەتەکەی.
بە گوێرەی راپرسیی دوای دەنگدان، ئەنجامە نافەرمییەکان بەم شێوەیەن:
پەرلەمانی بەرلین
یەکێتی کرستیان دیمۆکرات (CDU): 20%
پاتی چەپ (دی لینکە): 24,5%
پارت سۆشیال دیمۆکرات (SPD): 12%
ئەڵتەرناتیڤ بۆ ئەڵمانیا (AfD): 16%
پارتی سەوز: 15%
هاوپەیمانی سارا ڤاگنکنێشت (BSW): 5%
پەرلەمانی هەرێمی مێکلنبێرگ فۆرپۆمەرن:
ئەڵتەرناتیڤ بۆ ئەڵمانیا (AfD): 37%
یەکێتی کرستیان دیمۆکرات (CDU): 5,5%
پاتی چەپ (دی لینکە): 7,5%
پارت سۆشیال دیمۆکرات (SPD): 35,5%
پارتی سەوز: 5,5%
هاوپەیمانی سارا ڤاگنکنێشت (BSW): 5%
