رووداو دیجیتاڵ | تەکنەلۆجیا و ئابووری
میسر پلانی داناوە یەکەمین سەنتەری گەورەی داتای تایبەت بە ژیریی دەستکرد دروستبکات، کە پڕۆژەیەکی 200 مێگاواتییە بە بەهای یەک ملیار دۆلار و پشت بە تەکنەلۆجیای کۆمپانیای ئێنڤیدیای ئەمریکی دەبەستێت.
رەئفەت هیندی، وەزیری پەیوەندییەکان و تەکنەلۆجیای زانیاریی میسر رۆژی چوارشەممە راگەیاندنی ئەم پڕۆژەیەی ئاشکرا کرد؛ ئەوەش لە کاتێکدایە هەردوو رکابەرە سەرەکییەکەی جیهان لە بواری ژیریی دەستکرد – ئەمریکا و چین – لە کێبڕکێیەکی توونددان بۆ بەدەستهێنانی پێگەیەکی بەهێزتر لە رۆژهەڵاتی نێوەڕاست و کیشوەری ئەفریقیا.
پێشبینی دەکرێت لە قۆناخی یەکەمی سێ ساڵەی پڕۆژەکەدا، داتاسەنتەرێک بە توانای 20 مێگاوات و بە بەهای 200 ملیۆن دۆلار لە رێگەی هاوبەشیی نێوان ڤۆدافۆن بیزنیس، کۆمپانیای سوێدی و کاساڤا تەکنۆلۆجیز، کە هاوبەشی سەرەکیی ئێنڤیدیایە لە ئەفریقیا دەستپێبکات.
کۆمپانیای ئێنڤیدیای ئەمریکی کە گەورەترین بەهای لە بازاڕی پشکەکاندا هەیە، هێزی سەرەکیی پشت ئەم شۆڕشە نوێیەی ژیریی دەستکردە. یەکەکانی پرۆسێسەری گرافیکیی کۆمپانیاکە (GPUs) لە داتاسەنتەرەکانی سەرتاسەری جیهان بەکاردەهێنرێن بۆ راهێنانی مۆدێلەکانی ژیریی دەستکرد. هەروەها کۆمپانیای کاساڤا تەکنۆلۆجیز رایگەیاندووە کە سەنتەرەکەی میسر "سوود لە تەکنەلۆجیای پێشکەوتووی ژمێریاریی خێرای ئێنڤیدیا وەردەگرێت."
کێبڕکێی واشنتن و پەکین لەسەر میسر
پێش یەکەم سەردانی شی جینپینگ، سەرۆکی چین بۆ میسر لە ماوەی دە ساڵی رابردوودا کە هەفتەی پێشوو کرا، ئاژانسی بلومبێرگ بڵاویکردەوە کۆمپانیای هواوەی چینی پێشنیازێکی بۆ دروستکردنی داتاسەنتەرێک پێشکێشی قاهیرە کردووە، ئەمەش واشنتنی هاندا تاوەکو لە رێگەی کۆمپانیا ئەمریکییەکانی وەک ئێنڤیدیا، ئەی ئێم دی (AMD) و مایکرۆسۆفت پێشنیازێکی بەهێزتر بخاتە بەردەم میسر.
لەو سەردانەدا، شی جینپینگ و عەبدولفەتاح سیسی، سەرۆککۆماری میسر لەسەر "فراوانکردنی هاوکارییەکان" لە بواری ژیریی دەستکرد و تەکنەلۆجیادا رێککەوتن، بەڵام هیچ رێککەوتننامەیەکی فەرمیی کۆنکریتییان واژۆ نەکرد.
رۆژی پێنجشەممەی رابردوو، رۆژێک دوای ئەوەی سەرۆکی چین قاهیرەی بەجێهێشت، وەزیری پەیوەندییەکانی میسر لەگەڵ شاندێکی ئەمریکی لە گەشەپێدەرانی داتاسەنترەکان کۆبووەوە. میدیای فەرمیی میسریش ئاماژەی بەوە کرد کە قاهیرە بە پەرۆشە بۆ دروستکردنی هاوبەشیی نێودەوڵەتی تاوەکو وڵاتەکەی بکاتە "ناوەندێکی هەرێمی بۆ داتاسەنتەرەکان."
⚡ ئاڵنگاریی وزە و کارەبا لە ئەفریقیا
پەرەپێدانی ژێرخانی ژیریی دەستکرد لە ئەفریقیا هێواشترە بەراورد بە ناوچەکانی دیکەی جیهان، ئەوەش بەشێکی بەهۆی لاوازیی تۆڕەکانی کارەبایە لە زۆربەی وڵاتانی ئەو کیشوەرەدا؛ لە کاتێکدا داتاسەنتەرەکانی تایبەت بە ژیریی دەستکرد بڕێکی یەکجار زۆری وزەی کارەبا بەکاردەبەن کە دەگاتە پێنج هێندەی ئەو وزەیەی سەنتەرە نەریتییەکان پێویستیان پێیەتی.
* میسر کە قەرەباڵخترین وڵاتی عەرەبی و دووەم گەورەترین ئابووریی کیشوەری ئەفریقیایە، ساڵانێکە بەدەست کورتهێنان و قەیران لە دابینکردنی وزەی کارەبادا دەناڵێنێت.
