رووداو دیجیتاڵ
لێکۆڵینەوەیەکی نوێی رۆژنامەڤانی، نهێنییەکی شۆکهێنەری ئاشکرا کردووە. کۆمپانیا زەبەلاحەکانی تەکنەلۆجیا بە نهێنی هەزاران پەرتووکی چاپکراو و دەگمەن دەکڕن، تەنیا بۆ ئەوەی پەڕەکانیان لێکبکەنەوە و بۆ راهێنانکردن بە ژیریی دەستکرد بەکاریانبهێنن.
ئەم نهێنییە چۆن ئاشکرا بوو؟
رۆژنامەڤانانی ماڵپەڕی 404 Media گومانیان کرد کە بۆچی لەم دواییانەدا کەسانێکی نەناسراو بە لێشاو و بەکۆمەڵ پەرتووکە دەگمەنەکان دەكڕن. بۆیە لەگەڵ پەرتووکفرۆشێک رێککەوتن و ئامێرێکی چاودێریی بچووکی کۆمپانیای ئەپڵ (AirTag)یان خستە نێو یەکێک لە پەرتووکەکانەوە کە بەشێک بوو لە داواکارییەکی گەورە بۆ کڕینی هەزار پەرتووک.
ئامێرە بچووکەکە بە چەندین ویلایەتی ئەمریکادا گەشتی کرد و لە کۆتاییدا لە کارگەیەکی زۆر پارێزراوی کۆمپانیای ئەمازۆن لە شاری لاس ڤێگاس وەستا.
لەو کارگەیەی ئەمازۆن چی روودەدات؟
لەوێدا بەشێکی تایبەت هەیە بە ناوی نهێنیی VGT3. کاری ئەم بەشە ئەوەیە، بەرگی ئەو پەرتووکانەی دەکڕدرێن لێدەکاتەوە و پەڕپەڕیان دەکات، پاشان سەرجەم پەڕەکان سکان دەکات بۆ ئەوەی بیانکاتە کۆپییەکی دیجیتاڵی تاوەکو ژیریی دەستکرد بیخوێنێتەوە و لە کۆتاییشدا خودی پەرتووکە چاپکراو و رەسەنەکە لەنێودەبات.
بۆچی ئەمازۆن ئەم کارە دەکات؟
کۆمپانیاکانی ژیریی دەستکرد ئێستا زۆر پێویستیان بە "داتای پاک و باوەڕپێکراو" هەیە بۆ ئەوەی بەرنامەکانیانی پێ زیرەک بکەن. ئەوان بەتایبەتی بەدوای ئەو پەرتووکانەدا دەگەڕێن کە پێش ساڵی 2022 چاپکراون، چونکە دڵنیان کە ئەو پەرتووکانە بەرهەمی مێشکی مرۆڤن و هیچ شتێکیان لەرێگەی ژیریی دەستکردەوە نەنووسراوە.
کارەساتەکە لە کوێدایە؟
لەلایەکەوە، فرۆشیارانی پەرتووک زۆر نیگەرانن کاتێک دەبینن ئەو پەرتووکە دەگمەنانەی دەیانفرۆشن، لەبری ئەوەی بپارێزرێن، لەلایەن ئەمازۆنەوە دەدڕێندرێن و لەنێودەبرێن.
لەلایەکی دیکەشەوە، کێشەیەکی گەورەی یاسایی و ئەخلاقی دروستبووە؛ ئایا ئەمازۆن مافی ئەوەی هەیە ئەو پەرتووکانەی مافی لەبەرگرتنەوەیان پارێزراوە بیانکاتە دیجیتاڵی و بەکاریانبهێنێت؟ ئەمازۆنیش لە وەڵامدا دەڵێت، ئەوان پەرتووکەکان بەشێوەیەکی یاسایی دەکڕن و بۆ باشترکردنی خزمەتگوزارییەکانیان بەکاریاندەهێنن.
.jpg&w=3840&q=75)
