رووداو دیجیتاڵ
دوای ئەوەی بۆ ماوەیەکی لادرا و رێگری لە داگرتنی کرا، جارێکی دیکە ئەپڵیکەیشنی تەلەگرام لە ئەپ ستۆری سەر بە کۆمپانیای ئەپڵ دەرکەوتەوە.
بەرەبەیانی رۆژی سێشەممە 4ی ئاب، کاتێک بەکارهێنەران لەنێو کۆگای ئەپ ستۆر بۆ تەلەگرام دەگەڕان، ئەپڵیکەیشنەکە دەرنەدەکەوت، بەمەش بەکارهێنەرە نوێیەکان نەیاندەتوانی دایبگرن. بەڵام دواتر لە هەمان رۆژدا، ئەپڵیکەیشنەکە گەڕایەوە نێو ئەنجامەکانی گەڕان و توانای داگرتنیشی کارا کرایەوە.
دوای بڵاوبوونەوەی هەواڵی دیارنەمانی تەلەگرام لە ئەپ ستۆر، بەهای دراوی دیجیتاڵیی (گڕام - GRAM) کە پەیوەستە بە تەلەگرامەوە و پێشتر بە (تۆن - TON) ناسرابوو، بە رێژەی زیاتر لە 5٪ بەراورد بە رۆژی پێشتر دابەزی.
سەرەتا نە ئەپڵ و نە تەلەگرام هۆکاری ئەو سڕینەوە لەناکاوانەیان روون نەکردەوە، ئەمەش دەرگای بۆ چەندین دەنگۆ کردەوە؛ هەندێک لە بەکارهێنەرانی تۆڕە کۆمەڵایەتییەکان رووداوەکەیان بەستەوە بە نوکتەیەکی ئەم دواییەی تەلەگرامەوە لەسەر دۆسیەی جێفری ئیپستین.
بەڵام دواتر، گوتەبێژێکی کۆمپانیای ئەپڵ بە ئاژانسی بلومبێرگی راگەیاند: "ئێمە بۆ ماوەیەکی کورت تەلەگراممان لە ئەپ ستۆر سڕییەوە، ئەوەش دوای ئەوەی لە پێداچوونەوەکانماندا دەرکەوت کە ناوەڕۆکێک بڵاوکراوەتەوە کە پێشێلی رێنماییە تووندەکانمان دەکات سەبارەت بە قەدەخەکردنی بڵاوکردنەوەی وێنە و ڤیدیۆی دەستدرێژیی سێکسی بۆ سەر منداڵان."
گوتەبێژەکەی ئەپڵ روونیکردەوە: "ئەپڵیکەیشنەکە دوای ئەوە گەڕێندرایەوە، کە گەشەپێدەرانی تەلەگرام بەپەلە ناوەڕۆکەکەیان سڕییەوە و هەژماری ئەو کەسەشیان قەدەخە کرد کە بڵاویکردبووەوە."
کۆمپانیای تەلەگرام گەڕانەوەی ئەپڵیکەیشنەکەی لە ئەپ ستۆر پشتڕاستکردەوە و لە هەژماری فەرمیی خۆی لە تۆڕی ئێکس (X) بە گاڵتەوە نووسی: "دەنگۆکانی لەنێوچوونم، زۆر زیادەڕەوییان تێدا کراوە."
ئەمە یەکەمجار نییە تەلەگرام لە کۆگای ئەپڵ بسڕدرێتەوە. لە شوباتی 2018ـدا، ئەپڵ بەهۆی بڵاوبوونەوەی "ناوەڕۆکی نەشیاو" لە چەند کەناڵێکی تەلەگرامدا، ئەپڵیکەیشنەکەی لەسەر ئاستی جیهان سڕییەوە، بەڵام دوای ئەوەی تەلەگرام رێکاری زیاتری بۆ پاراستنی ناوەڕۆک گرتەبەر، جارێکی دیکە گەڕێندرایەوە. هەروەها تەلەگرام لە ساڵی 2024 بە فەرمانی حکومەت لە ئەپ ستۆری چین سڕدرایەوە و تاوەکو ئێستاش لەوێ بەردەست نییە.
لە چەند ساڵی رابردوودا، تەلەگرام لە سەرانسەری جیهان رووبەڕووی چاودێریی یاسایی تووندتر بووەتەوە، لەنێویاندا دۆسیە یاساییە بەردەوامەکانی ئوسترالیا بە تۆمەتی سڕینەوەی "ناوەڕۆکی تووندڕەوانە"، هەروەها دۆسیەیەکی پەیوەست بە تیرۆر کە لەلایەن دەسەڵاتدارانی رووسیاوە دژی پاڤێڵ دورۆڤ، بەڕێوەبەری جێبەجێکار و دامەزرێنەری تەلەگرام جووڵێندراوە و فەرمانی دەستگیرکردنیشی بۆ دەرکراوە.
