رووداو دیجتاڵ
گەورە ئابووریناسی رێکخراوی فاو هۆشداری دەدات گرژی و ململانێکان لە ناوچەکە، بەتایبەت ئەوانەی پەیوەندییان بە ئێرانەوە هەیە، دەبنە هۆی بەرزبوونەوەی زیاتری نرخی خۆراکی تەندروست لە جیهاندا. دەشڵێت، تەنگەی هورمز دەرچەیەکی یەکلاکەرەوەیە بۆ گواستنەوەی کەرەستە سەرەکییەکانی بەرهەمهێنانی خۆراک.
ماکسیمۆ تۆرێرۆ، گەورە ئابووریناسی رێکخراوی خۆراک و کشتوکاڵی نەتەوە یەکگرتووەکان (فاو) لە لێدوانێکدا بۆ رووداو رایگەیاند، ئەگەری داخستن یان دروستبوونی ئاستەنگ لە تەنگەی هورمز مەترسییەکی گەورەیە بۆ سەر ئاسایشی خۆراکی جیهانی.
تۆرێرۆ دەڵێت: "تەنگەی هورمز یەک لەسەر چوار بۆ یەک لەسەر سێی کەرەستە سەرەکییەکانی تەواوی سیستمی خۆراک دەگوازێتەوە، لەوانەش گازی سروشتی، کبریت و ئەو ترشانەی بۆ دروستکردنی پەین بەکاردێن، لەگەڵ وزە. هەر پچڕانێک لەو ناوچەیە دروستببێت، دەبێتە هۆی بەرزبوونەوەی نرخی ئەو کەرەستانە و لە ئەنجامدا نرخی خۆراکیش گرانتر دەبێت."
75%ی نرخی خۆراک بۆ گواستنەوە و کۆگاکردنە
بەگوێرەی ئامارەکانی راپۆرتی نوێی "فاو"، تێچووی خۆراک تەنیا پەیوەست نییە بە کێڵگەکانەوە. گەورە ئابووریناسەکەی نەتەوە یەکگرتووەکان ئاماژەی بەوە کرد، 75%ی ئەو نرخەی بەشداربووان (کڕیاران) بۆ خۆراکی دەدەن، دوای جێهێشتنی کێڵگەکان زیاد دەکات، ئەویش تێچووی گواستنەوە و کۆگاکردنە. ئەمەش ئەوە دەسەلمێنێت ناسەقامگیریی رێڕەوە ئاوییەکان و گرانبوونی وزە چەندە کاریگەریی راستەوخۆیان لەسەر بژێوی خەڵک هەیە.
لە وەڵامی پرسیارێکی رووداودا سەبارەت بەو ناوچانەی زۆرترین زیانیان بەرکەوتووە، ماکسیمۆ تۆرێرۆ گوتی: "ناوچەی ئەمریکای لاتین و بەتایبەتی دەریای کاریبی، خراپترین دۆخیان هەیە لە رووی بەرزیی تێچووی خۆراکی تەندروستەوە. پارادۆکسەکە لێرەدایە کە ئەمە کیشوەرێکە خۆی خۆراکێکی زۆر هەناردەی جیهان دەکات، کەچی خەڵکەکەی بە زەحمەت دەستیان بە خۆراکی تەندروست دەگات."
خۆراکی تەندروست و مافی مرۆڤ
لەلایەکی دیکەوە، ستێفان دوجاریک، گوتەبێژی سکرتێری گشتیی نەتەوە یەکگرتووەکان لەبارەی بەرپرسیارێتی حکومەتەکان بۆ دابینکردنی خۆراکی تەندروست بە رووداوی راگەیاند: "حکومەتەکان ئەرکی سەرشانیانە دڵنیابنەوە لەوەی گەلەکەیان بە ئازادی و تەندروستی بژین."
هەرچەندە ستێفان راستەوخۆ وشەی "ماف"ی بۆ دەستڕاگەیشتن بە خۆراک بەکارنەهێنا، بەڵام پرسی دابینکردنی خۆراکی بە بنەمایەکی سەرەکی بۆ ژیانی ئازادانەی مرۆڤ دانا.
بڕیارە هەفتەی داهاتوو، رێکخراوی فاو ووردەکاریی زیاتر لەبارەی دۆخی خۆراک و نرخەکان لە راپۆرتێکی گشتگیردا لە شاری رۆمای پایتەختی ئیتاڵیا بڵاو بکاتەوە.
