رووداو دیجیتاڵ
پەرلەمانی ئەورووپا ئامادەکاری دەکات بۆ دەستپێکردنی رێکارێکی فەرمی دژی هاوپەیمانی "ئەورووپای نەتەوە سەروەرەکان"، کە پارتی "جێگرەوە بۆ ئەڵمانیا" و چەند پارتێکی دیکەی راستڕۆی تووندڕۆ لەخۆدەگرێت.
ئەگەر بسەلمێنرێت کە ئەو هاوپەیمانییە نەیتوانیوە پابەندی بنەما سەرەکییەکانی یەکێتیی ئەورووپا بێت، ئەوا دەبێتە هۆی سڕینەوەی تۆمارە فەرمییەکەی و بڕینی بودجەی یەکێتیی ئەورووپا لێی. زیاتر لە 180 ئەندامی پەرلەمان واژۆیان لەسەر داواکارییەک کردووە بۆ چالاککردنی پرۆسەی لێکۆڵینەوە لەبارەی پابەندبوونی ئەو هاوپەیمانییە.
بڕیارە رۆژی سێشەممە لە شاری ستراسبۆرگ ئەو پرسە لە پەرلەمانی ئەورووپا بخرێتە دەنگدانەوە.
بەرپرسانی پەرلەمانی ئەورووپا ئاماژە بەوە دەکەن، فراکسیۆنەکانی "پارتی گەلی ئەورووپا"، "سۆسیالیست و دیموکراتەکان" و "نوێکردنەوەی ئەورووپا" بە نیازن پشتگیری لەو پێشنیازە بکەن، ئەمەش دڵنیایی دەدات لەوەی داواکارییەکە پەسند دەکرێت.
ئەم هاوپەیمانێتییە لە ئابی 2024 لەلایەن هەشت فراکسیۆنەوە دامەزراوە و لەلایەن پارتی "جێگرەوە بۆ ئەڵمانیا" سەرکردایەتی دەکرێت؛ هەریەک لە پارتەکانی "کۆنفیدراسیۆن"ی پۆڵەندی و "ریکۆنکوێست"ی فەرەنسی تێیدا ئەندامن.
یاساکانی یەکێتیی ئەورووپا دەڵێن، لەکاتێکدا پارتەکان وەک هاوپەیمانی بودجەی راستەوخۆ وەردەگرن، بەڵام ئەگەر پارتەکەش هەڵبوەشێتەوە، یاسادانەران و گرووپە پەرلەمانییەکان بە تاک رووبەڕووی هیچ لێکەوتەیەکی یاسایی نابنەوە.
دۆسیەی بەڵگەکان
سەرۆکی دەستەی رێکخەر پێشتر دامەزراوەکانی یەکێتیی ئەورووپای لە هەندێک راستی ئاگادار کردووەتەوە کە گومان دەخەنە سەر پابەندبوونی ئەو گرووپە بە مافەکانی مرۆڤ، دیموکراسی و پاراستنی کەمینەکان.
دۆسیەیەکی 294 لاپەڕەیی وردەکاریی بڕیارەکانی دادگە، لێدوانە فەرمییەکان و چالاکییەکانی سۆشیال میدیای گرووپە ئەندامەکانی تێدایە، کە رەنگە پێشێلکردنی بنەماکانی ئەورووپا بسەلمێنن. ئەو بەڵگانەی کۆکراونەتەوە گوتاری دژە جوو، دژە هاوڕەگەزخواز و دژە کۆچبەران لەخۆدەگرن، لەگەڵ بانگەشەکردن بۆ ناردنەوەی بیانییەکان.
لە دۆسیەکەدا باس لە لافیتەی رەگەزپەرستانەی پارتێکی چیکی و هەوڵی گرووپێکی بولگاری بۆ راگرتنی هەندێک فیلم دەکرێت. هەروەها ئاماژە بە بڕیارێکی دادگەی ئەڵمانیا دراوە کە دەڵێت بەرنامەی پارتی (ئەی ئێف دی) دژی شکۆی مرۆڤە.
هەنگاوە یاساییەکانی داهاتوو
گوتەبێژێکی ئەو هاوپەیمانییە تۆمەتەکانی رەتکردەوە و گوتى، فراکسیۆنەکەیان رووبەڕووی رەخنە دەبێتەوە تەنیا لەبەر ئەوەی باسی کێشە راستەقینەکانی خەڵک دەکەن و لە چوارچێوەی ئازادیی رادەربڕیندا بەرگری لە هەڵوێستەکانیان دەکەن.
دوای دەستپێکردنی رێکارە یاساییەکان، دەبێت دەستەی رێکخەر ئەنجامە فەرمییەکانی خۆی پێشکەشی هاوپەیمانییەکە بکات، ئەمەش دەرفەتێک دەبێت بۆ ئەوەی ئەگەر هەبێت سیاسەتەکانیان راست بکەنەوە.
دواتر رێکخەرە سەربەخۆکە بڕیار دەدات کە ئایا رێکخراوەکە لە تۆماری ئەورووپی بسڕێتەوە یان نا، کە پەرلەمان و ئەنجوومەنی ئەورووپا دەسەڵاتی کۆتاییان هەیە بۆ هەڵوەشاندنەوەی ئەو بڕیارە.
