روودو دیجیتاڵ
ئابێلاردۆ دێ لا ئێسپریێلا، کەسایەتییەکی جیاواز و بازرگانێکە کە هیچ باکگراوندێکی سیاسیی نەبووە، بەڵام ئێستا خەریکە دەبێتە سەرۆکی نوێی کۆڵۆمبیا. بەهۆی ئەوەی جیاواز بوو لە سیاسەتڤانە ئاساییەکان، توانی متمانەی خەڵک بەدەستبهێنێت.
ئەم پارێزەر و بازرگانە، کە خاوەنی براندی جلوبەرگ، خواردنەوەی کحولی و چێشتخانەیە، پاڵپشتیی دۆناڵد ترەمپ، سەرۆکی ئەمریکای بەدەستهێنا. لە هەڵبژاردنی رۆژی دووشەممەدا بە جیاوازیی تەنیا 1٪ (واتە نزیکەی 251 هەزار دەنگ) پێش رکابەرەکەی کەوت.
بڕیارە ئەم هەفتەیە بەفەرمی وەک براوە رابگەیێندرێت، بەڵام رکابەرەکەی بە ناوی ئیڤان سێپێدا کە نزیکە لە سەرۆکی ماوە تەواوبووی کۆڵۆمبیا، ئەنجامەکانی هەڵبژاردنەکە رەتدەکاتەوە و تانەی لێداوە.
سەرکەوتنی دێ لا ئێسپریێلا نیشانی دەدات کە خەڵکی کۆڵۆمبیا بێزارن لە سیاسەتڤانە کۆنەکان و گوستاڤۆ پێترۆی سەرۆکی چەپڕۆی ئێستا. خەڵک بەدوای کەسێکی نوێدا دەگەڕان بۆ چارەسەرکردنی کێشەکانی ئاسایش و ئابووری.
بەرەنگاربوونەوەی تاوان: براوەی هەڵبژاردنەکە بەڵێنی داوە بە "مستێکی ئاسنین" رووبەڕووی تاوان و باندە چەکدارەکان ببێتەوە.
کۆتاییهێنان بە دانوستاندن: دەیەوێت کۆتایی بە هەوڵەکانی سەرۆکی پێشوو بهێنێت کە دەیویست لە رێگەی دانوستاندنەوە کێشەی گرووپە چەکدارەکان چارەسەر بکات، کە ئەو هەوڵانە شکستیان هێنابوو.
زیندانی زەبەلاح: بەڵێنی داوە زیندانی زەبەلاح دروست بکات، هاوشێوەی ئەوەی نایب بوکێلێ، سەرۆکی سلڤادۆر دژی باندەکان کردی.
دۆخی کۆڵۆمبیا چۆنە؟
لە هەڵبژاردنەکەدا زیاتر لە 26 ملیۆن کەس دەنگیان داوە.
ساڵی رابردوو لە کۆڵۆمبیا 14 هەزار و 780 کەس کوژراون، کە بەرزترین رێژەی کوشتنە لە ساڵی 2015ـەوە، هۆکارەکەشی شەڕی نێوان گرووپە چەکدارە نایاساییەکانە کە زیاتر لە 27 هەزار چەکداریان هەیە. خەڵک پێیانوایە سەرۆکی پێشوو نەیتوانیوە ئاسایش دابین بکات و نرخی کاڵاکانیش زۆر گران بوون.
رکابەرایەتیی نێوان دوو رکابەرەکە
دێ لا ئێسپریێلا، کە ناسناوی "پڵنگ"ـی هەیە، بە لایەنگرانی سەرۆکی پێشووی گوت: "بارگەتان بپێچنەوە و ئامادە بن ببنە ئۆپۆزیسیۆن... ئێوە دەزانن پڵنگ چۆن دەنەڕێنێت."
لە وەڵامدا رکابەرەکەی گوتی: "هەڕەشەمان لێ مەکە، نە نەڕە نەڕت و نە هاوارەکانت نامانترسێنن." دواتر گرژی دروستبوو و لە شاری کالی چەند کەسێک رژانە سەر شەقامەکان و زیانیان بە پاسێک و ئامێری راکێشانی پارە (ATM) گەیاند.
پەیامی دۆناڵد ترەمپ
دێ لا ئێسپریێلا ناسنامەی کۆڵۆمبی و ئەمریکیشی هەیە و ئەندامی پارتی کۆمارییەکانی ئەمریکایە. دۆناڵد ترەمپ لە تۆڕی کۆمەڵایەتیی ترووس سۆشیاڵ پیرۆزبایی لێکرد و نووسیویەتی: "پیرۆزە لە ئێل تیگرێ - پڵنگەکە ئابێلاردۆ دێ لا ئێسپریێلا، سەرۆکی نوێی کۆڵۆمبیا! جێگەی شانازییەکی گەورە بوو کە پاڵپشتیم کرد و بەپەرۆشەوە چاوەڕێم پێکەوە کار بکەین بۆ دروستکردنی پەیوەندییەکی بەهێز لەنێوان کۆڵۆمبیا و ئەمریکا، کە مەزنایەتییەکی نوێ بۆ هەردوو وڵاتەکەمان دەهێنێت!"
براوەی هەڵبژاردنەکە لە 7ـی ئابەوە دەستبەکار دەبێت و بۆ ماوەی 4 ساڵ سەرۆکایەتیی وڵاتەکە دەکات. ئەمەش هاوتەریبە لەگەڵ شەپۆلێکی نوێ لە ئەمریکای لاتین، کە تێیدا خەڵک کەسانی دەرەوەی سیاسەت هەڵدەبژێرن، وەک خاڤیێر میلێی لە ئەرجەنتین و دانیێل نۆبۆوا لە ئێکوادۆر.
.jpg&w=3840&q=75)
