رووداو دیجیتاڵ ڤلادیمیر پووتین، سەرۆکی رووسیا، رەخنەکانی رۆژئاوای رەتکردەوە کە باس لە داڕمانی ئابووریی وڵاتەکەی دەکەن و رایگەیاند، بزوێنەری ئابووریی رووسیا هێشتا بەهێزە و وڵاتەکەی خەریکی بنیاتنانی ئابوورییەکی خاوەن "سەروەر"ییە. ئابووریی رووسیا لەنێوان سستی و جێگیری رۆژی هەینی، 5ـی حوزەیرانی 2026، پووتین لە کۆڕبەندی ئابووریی نێودەوڵەتیی سان پیتەرسبۆرگ - کە بە (داڤۆسی رووسیا) ناسراوە - رایگەیاند: "ئێمە لە هەموو لایەکەوە دەبیستین کە دەڵێن هەموو شتێک داڕماوە، بەڵام راستییەکە ئەوەیە کە ئێمە تەنیا گەیشتووینەتە هەمان ئەو ئاستەی وڵاتانی ناوچەی یۆرۆ لە چەند ساڵی رابردوودا تێیدا بوون." ئەم لێدوانانەی پووتین لە کاتێکدا دێن کە ئابووریی رووسیا لە سێ مانگی سەرەتای ساڵی 2026دا بە رێژەی 0.2% پاشەکشەی کردووە، ئەمەش یەکەمین دابەزینی وەرزییە لە سێ ساڵی رابردوودا. هەروەها حکومەتی رووسیا لە چوار مانگی سەرەتای ئەم ساڵدا 80 ملیار دۆلار کورتهێنانی بودجەی هەبووە. کاریگەریی جەنگ و گۆڕانی میوانەکان ئەو کۆڕبەندە لە کاتێکدا بەڕێوەدەچێت کە ئۆکراینا هێرشەکانی بۆسەر ژێرخانی وزەی رووسیا - وەک کۆگاکانی نەوت و پاڵاوگەکان - چڕتر کردووەتەوە. تەنانەت رۆژی چوارشەممە و هاوکات لەگەڵ کردنەوەی کۆڕبەندەکە، هێرش کرایە سەر دامەزراوەیەکی سان پیتەرسبۆرگ و دووکەڵی رەش لە ئاسمانی شارەکەدا بینرا. ئەسکەندەر کۆلیاندەر، پسپۆڕی ئابووریی رووسیای دانیشتووی لەندەن بە (فرانس پرێس)ی راگەیاند: "ئابووریی رووسیا دەچێتە نێو قۆناخێکی سستییەوە کە تێیدا سوودی بانکی و هەڵاوسان زۆر بەرزن." کۆلیاندەر ئاماژەی بەوەش کرد کە ئەمە "داخورانێکی خاوە" نەک داڕمانێکی کتوپڕ. لە کۆڕبەندی ئەم ساڵدا، پێگەی وەبەرهێنەرانی ئەمریکی و ئەورووپی بۆ میوانانی چین و سعودیە چۆڵکراوە. هەروەها لە هۆڵەکانی کۆڕبەندەکەدا رۆبۆتی پێشکەوتوو نمایش کراون. ئاستەنگەکان بۆ کارە بچووکەکان سەرەڕای گەشبینییەکانی پووتین، خاوەن کارە بچووکەکان لە ناوچە دوورەدەستەکانی رووسیا باس لە دۆخێکی سەخت دەکەن. سڤێتلانا، کە خاوەنی براندێکی جلوبەرگی منداڵانە لە شاری خەبارۆڤسک، بە (فرانس پرێس)ی گوت: "خەریکین شوێن کارەکانمان دادەخەین. خەڵک منداڵیان کەمتر دەبێت و تێچووەکانیش زۆر بەرزبوونەتەوە." سڤێتلانا ئاماژەی بەوەش کرد کە پچڕانی بەردەوامی ئینتەرنێت - کە حکومەت وەک رێکارێک بۆ پەکخستنی درۆنە ئۆکراینییەکان بەکاری دەهێنێت - وای کردووە ئامێرەکانی پارەدان بە کارت زۆرجار لەکار بکەون. نەوت و کێشەی هێزی کار هەرچەندە بەرزبوونەوەی نرخی نەوت بەهۆی جەنگی ئێرانەوە داهاتی رووسیای زیاد کردووە، بەڵام ئەمە بەس نەبووە بۆ پڕکردنەوەی بودجە. هاوکات رووسیا بەدەست کەمیی هێزی کارەوە دەناڵێنێت، چونکە مانگانە نزیکەی 30 هەزار کەس بۆ بەرەکانی جەنگ رەوانە دەکرێن. ئەسکەندەر کۆلیاندەر دەڵێ، ئەم داخورانە "نەگەڕاوەیە"، مەگەر ئەوەی کرێملن بڕیاری سیاسیی بوێرانە بدات، وەک کۆتاییهێنان بە جەنگ و رێکخستنەوەی پێکهاتەی ئابووریی وڵات.
جیهان05-06-2026یەکێتیی ئەورووپا هەنگاوی "سەروەریی تەکنەلۆژی" دەنێت؛ کێبڕکێی کۆمپانیا زەبەلاحەکانی ئەمریکا و چین دەکات
