رووداو دیجیتاڵ
لە گەڕەکی حەمیدیەی سەر بە ناوچەی سوڵتانبەیلی لە شاری ئەستەنبووڵ، گایەک لە دەستی خاوەنەکەی رایکرد و دوای دروستکردنی پشێوی لە کۆڵانەکاندا، خۆی کرد بە ناو سەرتاشخانەیەکدا. ئەم رووداوەش ترسی گەورەی لەلایەن کڕیاران و کارمەندانی ناو سەرتاشخانەکە دروست کرد.
رەشید کۆنی، خاوەنی سەرتاشخانەکە گوتی، گایەکە لە گەڕەکەکەی خوارەوەیان هاتبوو: "من دانیشتبووم کاتێک هەڵیکوتایە سەر دووکانەکەمان. کڕیار و منداڵیشی لێبوون. بۆ ئەوەی منداڵەکە نەترسێ، خۆم بەسەریدا دا؛ بەو هۆیەوە پارچە شووشە چوو بە دەستەکانمدا. خێر و سەدەقەمان لەسەرە کە رزگارمان بووە، سوپاس بۆ خوا".
دوای دەرچوونی لە سەرتاشخانەکە، خەڵکی گەڕەکەکە بۆ جڵەوکردنی گایەکە چوونە سەر شەقام، بەڵام هەوڵەکانیان بێسوود بوو. لە کۆتاییدا، دوای ئاگادارکردنەوەی تیمەکانی شارەوانی، توانرا بە زەحمەت گایەکە جڵەو بکرێت و رادەستی خاوەنەکەی بکرێتەوە.
ئەم رووداوە لە کاتێکدایە، هەر ئەمڕۆ بەڕێوبەرایەتیی تەندروستیی ئیستەنبووڵ ئاماری یەکەم رۆژی جەژنی قوربانی بڵاوکردەوە، تێیدا 767 کەس بەهۆی رووداوەکانی پەیوەست بە سەربڕین و راکردنی ئاژەڵەکانەوە بریندار بوون.
دیاردەی بەڕەڵابوونی ئاژەڵی قوربانی ساڵانە لە شارە گەورەکانی تورکیا دووبارە دەبێتەوە و زۆرجار زیانی مادی بە ئۆتۆمبێل و دووکانەکان دەگەیێنێت، ئەمەش وای کردووە شارەوانییەکان تیمە تایبەتەکانی گرتنی ئاژەڵ لە حاڵەتی ئامادەییدا بهێڵنەوە کە بە بەکارهێنانی دەرزی بێهۆشکەر کێشەکە چارەسەر دەکەن بۆ ئەوەی رێگری لە برینداربوونی زیاتری هاووڵاتییان بکەن.