هاوسەرۆکی دەم پارتی: لە تورکیا ئاشتی بەدیبێنین دەیگوازینەوە بۆ رۆژئاڤاش

تولای هاتیمئۆغوڵڵاری، هاوسەرۆکی دەم پارتی ئێوارەی رۆژی دووشەممە، 1ـی ئەیلوولی 2025 لە گوتارێکیدا لە ئامەدی باکووری کوردستان رایگەیاند، هەموو هەوڵێک بۆ سەرخستنی پرۆسەی چارەسەری دەدەن و گوتیشی: ''بۆ بنیاتنانی دیموکراسی لەم وڵاتە، دەبێت زیاتر لەوەی ئێستا رێکخراوتر بین."

سەبارەت بە کاریگەریی رۆڵی عەبدوڵڵا ئۆجەلان، رێبەری زیندانیکراوی پەکەکە لە لیژنەکەی پەرلەمان، هاوسەرۆکی دەم پارتی ئاماژەی بەوە کرد: ''یەکێک لە هەنگاوە پێویستەکان بۆ چارەسەرکردنی پرسی کورد کە کێشەیەکی سەت ساڵەیە، کۆبوونەوەی لیژنەکەیە لەگەڵ بەڕێز ئۆجەلان''..

هاتیمئۆغوڵڵاری، چەکدانانە سیمبوولییەکەی 30 گەریلاکەی پەکەکەی بە هەلێکی مێژوویی وەسف کرد و گوتی، "بۆ ئەوەی پرۆسەی چەکدانان بەشێوەیەکی دروست بەردەوام بێت پێویستە حکومەتی تورکیا هەنگاوی یاسایی بۆ چارەنووسی گەریلاکانی پەکەکە بنێت."

بە گوتەی هاوسەرۆکی دەم پارتی، سەرخستنی پرۆسەی چارەسەری لە تورکیا کاریگەریی لەسەر رۆژئاوای کوردستان و سووریاش دەبێت. گوتیشی: ''ئەگەر لە تورکیا ئاشتی بەدیبهێنین، ئەو ئاشییە دەگوازینەوە بۆ رۆژئاڤا و سووریاش."

پڕۆسەی ئەمجارەی چارەسەری لە تورکیا، لە 1ـی تشرینی یەکەمی پار دەستیپێکرد، دواتر عەبدوڵڵا ئۆجەلان لە 27ـی شوباتی ئەم ساڵ داوای لە پەکەکە کرد کۆنگرە ببەستێ و چەک دابنێت. پەکەکەش لە ئایاری ئەم ساڵدا بڕیاری کۆتاییهێنان بە خەباتی چەکداری دا. رۆژی 11ـی تەممووزی ئەم ساڵیش 30 گەریلای پەکەکە بەشێوەیەکی سیمبوولی چەکەکانیان لە سنووری پارێزگای سلێمانی سووتاند.