دەم پارتی: پێشهاتی ئەرێنی لە پرۆسەی چارەسەری، رۆڵی لە بەدیموکراسیبوونی سووریا دەبێت

سەزایی تەمەللی، بریکاری سەرۆکی فراکسیۆنی پارتی یەکسانی و دیموکراسیی گەلان (دەم پارتی) رۆژی هەینی، 29ی ئابی 2025 لە هەڤپەیڤینێکیدا لەگەڵ میدیایەکی نزیک لە پارتی کرێکارانی کوردستان (پەکەکە) لەبارەی پرۆسەی چارەسەری قسەی کرد.

بە گوتەی تەمەللی، بۆ بەرەپێشبردنی پرۆسەکە، پێویستە حکومەتی تورکیا هەنگاوی یاسایی بۆ سیاسەتکردنی گەریلاکانی پەکەکە لە تورکیا بنێت؛ گوتیشی، ''ئەگەر هەنگاو لەمبارەیەوە نەنرێت، ناتوانرێ هەنگاو لە بابەتەکانی دیکەش بنرێت، ئەگەر هەنگاویش بنرێت، کەموکوڕی تێدا دەبێت.''

بریکاری سەرۆکی فراکسیۆنی دەم پارتی سەبارەت بە کاریگەریی پرۆسەکە لەسەر رۆژئاوای کوردستان و سووریا باسی لەوە کرد، ''روودانی پێشهاتی ئەرێنی لەبارەی پرۆسەکە لە تورکیا، رۆڵی لە بەدیموکراسیبوونی سووریاش دەبێت.''

پرۆسەی چارەسەریی ئەمجارەی تورکیا 1ی تشرینی یەکەمی پار بە دەستپێشخەریی دەوڵەت باخچەلی، سەرۆکی پارتی بزووتنەوەی نەتەوەیی تورکیا (مەهەپە) دەستیپێکرد.

بە مەبەستی سەرخستنی پرۆسەکە، عەبدوڵڵا ئۆجەلان 27ـی شوباتی ئەم ساڵ داوای لە پارتەکەی کرد کۆنگرە ببەستێت، خۆی هەڵبوەشێنێتەوە و چەک دابنێت.

پەکەکە لە 5-7ـی ئایاری ئەم ساڵ، 12ـەمین کۆنگرەی خۆی بەست و بڕیاری کۆتاییهێنان بە خەباتی چەکداری و خۆهەڵوەشاندنەوەی دا.

رۆژی 11ی تەممووزی ئەم ساڵ، 30 گەریلای پەکەکە لە رێوڕەسمێکدا لە ئەشکەوتی جاسەنە لە ناوچەی سوورداشی سەر بە پارێزگای سلێمانی بەشێوەیەکی سیمبوولی و وەک ''نیازپاکییەک'' چەکەکانیان سووتاند.